Амма улууһун «Айар абылаҥ» литературнай түмсүү 7 киһилээх дэлэгээссийэ, Таатта улууһун Баайаҕа нэһилиэгэр Борис Федорович Неустроев-Мандар Ууһу кытта көрсөн кэллилэр. Бу айан-сырыы бибилэтиэкэ иһинэн тэриллибит литературнай түмсүү 10 сыллаах үбүлүөйдээх сылын чэрчитинэн тэрилиннэ.
В.М. Новиков -Күннүк Уурастыырап аатынан киин бибилэтиэкэ иһинэн тэриллэн үлэлиир айар куттаахтар “Айар абылаҥ” литературнай түмсүүлэрэ быйыл тэриллибитэ 10 сылын туолла. Үбүлүөйдээх сыллара ытык киһи Борис Федорович Неустроев -Мандар Уус 80 сааһын туолар сылыгар сөп түбэһэн, киниэхэ ыалдьыттыыр үрдүк аналланнылар.
“Баайаҕа ытык сиригэр тиийэн, айар куттаах дьон Мандар Уус уһанар дьиэтин, музей комплексын сөҕө-махтайа көрдүбүт. Саха саарына, бөлүһүөк, сахабыт ойуутун-мандарын, сиэрин-туомун тарҕатааччы сэргэх сэһэнин, кэрэ кэпсээнин иһиттибит. Саха өрөспүүбүлүкэтин суруйааччыларын сойууһун чилиэнэ Дария Васильева Амма Даайыс, олохтоох ааптардар Наталия Рязанская, Анатолий Стручков, Оксана Криворгницына, Марфа Харитонова. Мандарга анабыл хоһооннорун ааҕан, ытык кырдьаҕаһы олуһун диэн үөртүлэр, махтал истиҥ тылларын иһиттилэр”, — диэн түмсүү салайааччыта, кииннэммит бибилэтиэкэ кыраайы үөрэтэр салаатын кылаабынай бибилэтиэкэрэ Вероника Стручкова кэпсиир.
“Айар абылаҥнар” ытык киһини, саха саарынын кытта көрүһүннэрэр, илии тутуһан үбүлүөйдээх сааһынан эҕэрдэлиир дьикти, кэрэ, умнуллубат түгэни бэлэхтээбит салайааччыларыгар Вероника Стручковаҕа, улуустааҕы бибилэтиэкэ дириэктэрэ Прокопий Прокопьевка, сымнаҕастык илдьэ сылдьыбыт суоппар бибилэтиэкэ суоппарыгар Григорий Ивановка улахан махталларын тиэрдэллэр. Кинилэр “Таатта ,чахчы, саха омук култуурунай куодун илдьэ сылдьар Саха сирин Ытык дойдута эбит” диэн олус астынан, дуоһуйан, салгыы айарга-тутарга күүс-уох иҥэринэн кэллилэр.
“Амма олоҕо” хаһыат