Амма улууһун “Айар Уус” уус уран оҥоһуктар уопсастыбаннай түмсүүтэ Таатта улууһун Баайаҕатыгар тиийэн ытык киһини, Борис Неустроев- Мандар Ууһу 80 сааһын томточчу туолбутунан истиҥник эҕэрдэлээтэ, чугастык сэһэргэһэн, үтүө алгыһын ылан кэллэ. 19 киһилээх дэлэгээссийэни улуус дьокутааттарын Сэбиэтин бэрэссэдээтэлэ Владимир Колосов салайан илдьэ сырытта.
“Саха норуота бүттүүнэ тумус туттар Ытык киһибитин, дьиҥнээх норуот Педагогун, мындыр Уһуйааччыбытын Борис Федоровиһы -Мандар Ууһу 80 сааһын туолбут дьоһун-мааны бэлиэ күнүнэн Амма улууһун «Айар Уус» уус-уран оноһуктар маастардарын түмсүүтэ тиийэн анаан-минээн долгуйан туран эҕэрдэлээтибит.
Уустар түмсүүлэрин аатыттан Николай Рязанскайга анаан уруһуйдаппыт бэлэх хартыынабытын туттардыбыт. Улуус дьаһалтатын, депутаттарын аатыттан Владимир Колосов Юрий Борисов суруйбут «Амма фольклора» кинигэни, Алтан нэһилиэгин эдэр ууһа Семен Неустроев бэйэтэ онорбут кырыымпатын, айылҕалаах киһибит Григорьева Мотрена Ивановна -Чугдаара Хотун Алтан нэһилиэгин тутааччыларын туһунан кэпсиир кинигэни бэлэхтээтибит.
Борис Федорович үөрдэ, махтанна. Кинини кытта атах тэпсэн олорон кэпсэттибит, сэһэргэстибит, ытык киһибит сүбэтин, санаатын иһиттибит, алгыһын ыллыбыт. Бу кэнниттэн «Мандар Уус» айымньы Айылгы киинигэр уонна «Мандар Уус» этнологическай түмэл комплекс быыстапкатын, экспозицияларын көрдүбүт.
Ытык киһибитигэр өссө да уһун сылларга биһигини кытта бииргэ сырыт, ылсыбыт үлэҥ барыта үтүө түмүктээх буоллун уонна тапталлаах кэргэҥҥэр Федора Борисовнаҕа, чугас дьонугар дьолу-соргуну, уйгуну-быйаҥы баҕаран үөрэ-көтө, айа-тута тур диэн баҕа санаабытын этэн эҕэрдэлээн, туруоруммут сорукпутун ситэн кэллибит”, — диэн улуустааҕы «Айар Уус» уус-уран оҥоһуктар уопсастыбаннай түмсүүлэрин салайааччыта Ньургуйаана Колосова сырдатар.
“Амма олоҕо” хаһыат