Саха өрөспүүбүлүкэтин Судаарыстыбаннаһын күнүн көрсө улуус оскуолаларыгар үөрүүлээх линейкалар саҕаланнылар.
Бүгүн, балаҕан ыйын 25 күнүгэр, Л.В. Киренскай аатынан Амматааҕы лиссиэйгэ үөрүүлээх быһыыга-майгыга линейка буолла. Линейкаҕа улуус баһылыгын э.т. Василий Бураев уонна баһылыгы социальнай боппуруостарга солбуйааччы Николай Ларионов кыттыыны ыллылар.
«Бу күн биһиги өрөспүүбүлүкэбит историятын, култууратын уонна дойдубутун харыстыырга, таптыырга ыҥырар. Эһиги —биһиги кэскилбит буолаҕыт. Аммабыт уонна Сахабыт сирин инники кэскилэ эһигиттэн тутулуктаах. Үөрэнэҥҥит, сайдаҥҥыт, төрөөбүт дойдугутун таптааҥҥыт, бэйэҕит кылааккытын киллэрсиҥ!», — диэн Василий Иванович үөрэнээччилэргэ туһаайан эттэ.
Лиссиэй дириэктэрэ Дария Захарова Амма лиссиэйин историята суверенитеты кытта ыкса сибээстээҕин, суверенитет ылыллан, 1997 сыллаахха биһиги бастакы Бэрэсидьиэммит Михаил Николаев Ыйааҕынан оскуолабыт «Президент оскуолаларын ситимигэр» , билигин өрөспүүбүлүкэбит Ил Дархана Айсен Николаев Ыйааҕынан СӨ бастакы Бэрэсидьиэнин оскуолаларын ситимигэр киирбитин туһунан эттэ уонна оҕолору улууспут, өрөспүүбүлүкэбит өссө чэчирии сайдалларын туһугар үөрэниэҕин, үлэлиэҕин диэн ыҥырда. 11 кылаас үөрэнээччитэ Александрова Анастасия, бу сайын буолбут 29-с Петербургскай аан дойдутааҕы экономическай форумҥа сылдьан Арассыыйа Бэрэсидьиэнэ Владимир Путины кытта көрсүспүтүн кэпсээтэ уонна улуус дьаһалтатыгар, оскуолатыгар махталын тириэртэ.
Үөрүүлээх линейкаҕа Светлана Ефимовна Николаева уонна Мария Алексеевна Широких дуоскаларыгар кинилэр кылааттарын сыаналаан сибэкки дьөрбөтүн уурдулар. Светлана Ефимовна СӨ норуотун хаһаайыстыбатын үтүөлээх үлэһитэ, сэбиэскэй-партийнай салайааччы, быйыл алтынньы ыйга төрөөбүтэ 85 сылын туолар. Кини үтүө аата, үлэтэ-хамнаһа үйэлэргэ хаалар. Мария Алексеевна Саха АССР үтүөлээх учуутала, 70 сыл устата эдэр ыччаты ииппит-үөрэппит Амма улууһун биир киэн туттар учуутала этэ.
Акулина ИВАНОВА