Амма Наахара орто оскуолатыгар Аҕа дойду Дьоруойдарын күнүгэр үөрэнээччилэргэ Саха сирин Дьоруой уолаттарын туһунан кэпсиир линейка буолла. Линейкаҕа Дьоруой диэн кимин, биһиги аттыбытыгар баар ыксаллаах быһыыга-майгыга олохторун толук уурбут ыччаттарбытын билиһиннэрэн кэпсээтилэр.
Линейканы “Түмэн” сынньалан киин уус-уран салайааччыта Светлана Захарова, оскуола бибилэтиэкэрэ Надежда Григорьева олус сэргэхтик ыыттылар. Үөрэнээччилэр уордьаннаах эрэ дьоруойдар буолбакка күннэтэ алтыһар дьоннорбут тустарынан истэн соһуйдулар. Биир дойдулаахпыт Степанов Гоша оҕону ууттан быыһаары ууга былдьаммытын туһунан биллилэр. Бу күн Үлэ Дьоруойа П.И.Яковлев аатын сүгэр оскуолабыт түмэлигэр Ян Ефремов ыыппыт музейнай уруогар 7-8 кылаас үөрэнээччилэрэ Петр Ионович туһунан, ону тэҥэ анал байыаннай дьайыыга сылдьар, сылдьыбыт биһиги нэһилиэк ыччаттарын тустарынан элбэҕи биллилэр.
Түмэл салайааччыта Наталья Ефремова бэлэмнээбит кинигэ быыстапката болҕомтону тарта. Аҕа дойду сэриитин кыттыылааҕа Василий Иванович Яковлев — Мэник Баһылай туһунан кинигэни көрдүлэр, кини сэрии кэмигэр геройга түһэриллибитин, ол эрээри бу үрдүк ааты биэрбэтэхтэриттэн хомойдулар. Уруок бүтүүтэ үөрэнээччилэр уопсай кинигэлэри көрөн, билэр дьоннорун аймахтарын билэн-көрөн киэн тутуннулар. Маннык хорсун, дойдуларыгар бэриниилээх дьоннорунан холобур оҥосто, киэн тутта кэпсэттилэр. Бүтүн Арассыыйа үрдүнэн ыытыллар Герой күнүгэр аналлаах «Саллаат, эҕэрдэ!» акцияҕа кыттыһан сурук суруйдулар, уруһуй уруһуйдаатылар. Бу күн иннинэ оскуола үлэһиттэрэ 63 харысхалы илиилэринэн тутан-хабан оҥорон акцияҕа кыттыбыттара.
Ирина КОРЯКИНА-ОЛЕСОВА