Кыыс Амма оройуонугар кини айылҕатын курдук кэрэни сириэдитэр, үйэлээҕи түстүүр талааннаах дьоммут үгүстэр бөҕө буоллаҕа. Урукку дьыллар уорҕаларыттан силис тардан билиҥҥи кэм кэрдииһигэр диэри ааттаах-суоллаах, дьон сүгүрүйэр талааннаах биир дойдулаахтарбыт кэккэлэрэ хаҥыы турара үөрдэр. Олортон биирдэстэрэ, Саха өрөспүүбүлүкэтин уус-уран оҥоһуктарын маастара, Амма улууһун уран ууһа Ньургуйаана Колосова “Өбүгэ ииһин утумнаан” айар быыстапкатын тэрийбитин туһунан кэпсиэхпитин баҕарабыт. Маҥнайгы айар быыстапкаҕа көрөөччү, сэҥээрээччи даҕаны үгүһэ кини хатыламмат, ураты талааныгар сүгүрүйээччилэр элбэхтэрин туоһута буолла, Аммабытын ааттатар өссө биир ураты суоллаах-иистээх маастар тахсан эрэрин кэрэһэлээтэ.
Үрдүкү категориялаах эбии үөрэхтээһин педагога, О.П. Иванова-Сидоркевич аатынан Амматааҕы айар сайдыы киин педагога, элбэх оҕолоох дьиэ кэргэн Далбар Хотуна Ньургуйаана Михайловна олох кыра сааһыттан кэрэ эйгэтигэр чугаһа биллэн барбыта. Ол курдук, кыра эрдэҕиттэн уруһуйдуура, иистэнэрэ, оҕуруонан тиһэрэ, быысапкалыыра уонна “Радуга” оҕо үҥкүү бөлөҕөр сөбүлээн дьарыктанара. Оскуола кэнниттэн Култуура уонна Искусство колледжын хореография салаатын, салгыы Илин Сибиирдээҕи Култуура Академиятын Менеджмент үөрэҕин, кэлин С.Н. Донской аатынан Үөрэҕи үрдэтэр уонна идэни сайыннарар институт иһинэн “Эбии үөрэхтээһин педагогун” идэтин баһылаабыта.
Оттон иис абылаҥнаах дьарыгар ылларыыта 2009 сыллаахха дьиэ кэргэнинэн Туймаада ыһыаҕар сахалыы таҥас күрэҕэр кыттыыларыттан саҕаламмыта. Оччолорго эдэркээн Ньургуйаана хорсун санаатын киллэрэн, ким да көмөтө суох, бэйэтин толкуйунан, баҕатынан, түүннүри-күнүстэри олорон-туран, оҕолоругар, кэргэнигэр уонна бэйэтигэр сахалыы бырааһынньыкка кэтэр, аныгылыы моһуоннаах, стилизованнай дьиэ кэргэн таҥаһын тикпитэ. Соһуйуон уонна үөрүөн иһин, бу күрэххэ муҥутуур кыайыылаах аатын сүкпүттэрэ. Дьэ бу кынаттаах кыайыы Ньургуйаана Михайловна айар үлэтигэр бастакы үктэл уонна куорсун анньынар кыната буолбута.
Ол кэмтэн номнуо 15 сыл ааһа охсубут. Ньургуйаана Михайловна аата Амма улууһугар эрэ буолбакка, Саха сиригэр киэҥник ааттанар буолла. Ол курдук, хас сылын ахсын ыытыллар өрөспүүбүлүкэтээҕи Олоҥхо ыһыахтарыгар кыттан, куруук инники күөҥҥэ сылдьар, илии тутуурдаах, өттүк харалаах кэлэр, аммалары киэҥ түһүлгэлэргэ аатырдыан аатырдар.
Өлүөхүмэҕэ ыытыллыбыт XIV өрөспүүбүлүкэтээҕи Олоҥхо ыһыаҕар “Дойду кэрэ симэҕэ, дьоһун талба таҥаһа” күрэххэ “Аныгылыы тупсарыллыбыт таҥас” номинацияҕа 2-с Үрдэл, Саха АССР төрүттэммитэ 100 сылыгар аналлаах Үөһээ Бүлүүгэ ыытыллыбыт Олоҥхо ыһыаҕар “Тах курдук таҥнан, ох курдук оҥостон, сир симэҕинии симэнэн” күрэххэ 2-с Үрдэл, Маастар күнүгэр ананан ыытыллыбыт “Халадаай, хаһыаччык” өрөспүүбүлүкэтээҕи дьахтар кэмпилиэк таҥаһын тигиигэ профессиональнай маастарыстыбаны көрүү күрэҕэр 3 миэстэ, Дьокуускай куоракка ыытыллыбыт Улуу Туймаада ыһыаҕар “Ыһыаҕым талба-мааны таҥаһа –2023” сахалыы таҥаһы көрүү күрэҕэр “Төлкөлөөх иистэнньэҥ” анал аат хаһаайката уонна быйыл дойдубутугар Аммаҕа ыытыллыбыт Олоҥхо ыһыаҕар Саха норуотун уонна Саха сирин төрүт олохтоох омуктарын таҥаһын көрүү күөн күрэһэр”Дьиэ кэргэн ыһыахха кэтэр маанылаах таҥаһа” номинацияҕа 3 миэстэни ылары ситистэ.
Быыстапка күн Ньургуйаана Михайловна бэйэтэ тикпит сахалыы таҥастарын, ону сэргэ П. Иванова-Сидоркевич аатынан Амматааҕы айар сайдыы киинин педагогтара кини маастар-кылааһыгар сылдьан, кини ыйыытынан-кэрдиитининэн тиктибит маарыннаспат, ураты моһуоннаах оноолоох соннорун, сахалыы халадаайдарын сөҕө, хайгыы көрдүбүт.
Амма улууһа биир иннигэр уктар, холобур оҥостор маастарын бастакы быыстапкатынан Амма улууһун баһылыгын маҥнайгы солбуйааччы Василий Бураев, култуура салалтатын салайааччы Иван Иванов, үөрэх салалтатын исписэлииһэ Ньургуйаана Евсеева, Ньургуйаана Михайловна өр сылларга бииргэ үлэлээбит Амма лиссиэйин коллектива, билигин айа-тута, таһаарыылахтык үлэлии сылдьар О.П. Иванова-Сидоркевич аатынан Амматааҕы айар сайдыы киинин коллектива, улуус уустарын түмсүүтү салайааччы Роман Алексеев, Амматааҕы норуот айымньытын дьиэтин дириэктэрэ Петр Кулаковскай, Амма уран уустара, норуот маастардара, аймахтара эҕэрдэлээтилэр. Намтан тардыылаах Амма кэрэ кийиитэ айылҕаттан бэриллибит сатабыла тулуур, дьулуур күүһүнэн сайдыбытын бэлиэтээн туран, бу талаанын салгыы сайыннарарыгар, быыстапкалар өссө тэриллэ турарыгар ыллыктаах санааларын тиэртилэр.
Бу күн СӨ норуотун маастарын үрдүк аатын сүкпүт, Саха Өрөспүүбүлүкэтин Ил Түмэнин бэрэссэдээтэлин Махталынан бэлиэтэммит, «Амма улууһун үөрэҕириитин сайдыытын иһин» түөскэ анньыллар бэлиэнэн наҕараадаламмыт Ньургуйаана Колосова айар аартыга өссө аһыллан, саха култууратын сайыннарар, тарҕатар үлэтэ өссө элбээн иһиэ диэн бүк эрэнэбит.
«Амма олоҕо» хаһыат.