Бу өрөбүллэргэ өрөспүүбүлүкэбит киинигэр Дьокуускай куоракка, Арчы дьиэтигэр аммалыы оһуохай дьиэрэйдэ. Дьокуускай куоракка олорор биир дойдулаахтарбытын түмэр «Амма түмсүү» оһуохай түмсүүтүн кытта бииргэ Кыайыы оһуохайын дьиэрэттилэр.
«Аммабыт алгыһынан арчыланан Арчы дьиэтигэр түмсэммит аммалыы оһуохайбытын киин куораппыт олохтоохторугар, ыалдьыттарыгар билиһиннэрдибит. Ол курдук Александр Кузьмин салайааччылаах биир дойдулаахтарбыт түмсүүлэрэ иилээн саҕалаан өрөспүүбүлүкэҕэ бастакынан Кыайыыга анаммыт оһуохайбытын тэрийдибит. Дьон-сэргэ олус көхтөөхтүк кытынна. Үстүүн Нохсоороп айбыт-туппут оһуохайын миигин сэргэ эдэр дьоммут, «Күн оһуохайа» телевизионнай оҕолор ортолоругар ыытыллыбыт бырайыакка үһүс бочуоттаах миэстэлээх, «Кэскиллээх оһуохайдьыт» анал ааттаах Надя Дьяконова, Ромина Федорова, Юнона Васильева, сцена бэтэрээнэ Василиса Винокурова эттилэр. Оһуохайбыт бэрт тэрээһиннээхтик барда. Манна биир дойдулаахтарбыт Анна, Афанасий Томскайдар кыл кырыымпа кэрэ тыаһынан, эдэр кэскиллээх ырыаһыттар Мирнэйтэн биир дойдулаахпыт, Саха өрөспүүбүлүкэтин култууратын үтүөлээх үлэһитэ Иван Неустроев, Даниэль уонна Юлиан Матвеевтар ылбаҕай ырыаларынан киэргэттилэр», — диэн СӨ култууратын туйгуна Анфиса Федорова сырдатта.
«Амма олоҕо» хаһыат