Дойдуга уһуйааччы уонна Аҕа сүбэһит сылыгар Амма Наахара нэһилиэгин биир тумус туттар салайааччыта, өрөспүүбүлүкэҕэ, Арассыыйаҕа биллэр үлэлээх «Дуораанчык» уһуйаан сэбиэдиссэйэ Полина Петровна Кононова оҕо иитиитин эйгэтигэр салайааччынан ханна да халбаҥнаабакка үлэлээбитэ балаҕан ыйыгар 30 сыл буолла.
Биэс оҕо тапталлаах ийэтин, элбэх сиэн эйэҕэс эбэтин «Аныгы үйэ салайааччыта» диэн биир дойдулаахтара киэн тутта ааттыыбыт. Полина Петровна хас биирдии үлэһитигэр истиҥ сыһыаннаах, сүбэһит-амаһыт, ирдэбиллээх, саҥаттан-саҥа көрүүлээх киһи. Полина Петровна бу сыллар усталарыгар элбэх үлэһитин сүбэлээн-амалаан кэтэхтэн үөрэттэрэн идэтигэр толору эппиэттиир исписэлиистэри иитэн таһаарда.
«Дуораанчык» уһуйаан 2021 сыллаахха сылаас, ыраас саҥа таас дьиэтэ үлэҕэ киирэригэр сүүрбүт-көппүт киһинэн Полина Петровна буолар. Ыра санаабыт туолан билигин ыраахтан сандааран көстөр ханна да суох сылаас, ыраас уһуйааннаахпыт. «Дуораанчык» уһуйаан улууска экологическай иитии сүрүн киининэн, Саха сиригэр Үөрэхтээһин эйгэтигэр уһуйааннар тирэҕирэр тэрилтэлэрэ буолары ситистэ. Бу үлэлэр түмүктэринэн «Познаю мир родной природы» босуобуйа тахсан Саха сиригэр уһуйааннар үлэлэригэр туттуллар. Экологическай хайысханан үлэлиир уһуйаан араас акциялары, субуотунньуктары ыытар. Айылҕа харыстабылын тэрилтэлэрин кытта ситимнээхтик үлэлиир.
Полина Петровна нэһилиэк депутатынан уһун кэмҥэ таһаарыылаахтык үлэлээтэ. Кини 3 төгүл Амма улууһун мунньаҕын депутатынан, Саха Өрөспүүбүлүкэтин Учууталларын XI сэйиэстэрин кыттыылааҕа буолар. Саха сирин педагогическай энциклопедиятын 2005 сыллаах 3 кинигэтигэр биһиги салайааччыбыт Албан аата киирэн турар. Бастыҥ үлэтин, актыыбынай көрүүтүн иһин 2015 сыллаахха Светлана Ефимовна Николаева аатынан бэриэмийэни улууска бастакынан ылбыта үлэҕэ олус бэриниилээҕин туоһулуур.
Кини иллэҥ кэмигэр араас брошьтары хомуйан Амма Наахара нэһилиэгин иһинэн үлэлиир «Эгэлгэ» коллекционердар түмсүүлэрин биир тутаах киһитэ. Аны «Чэлгийээнэ» эбэлэр түмсүүлэрин кэрэ куоластаах бастыҥ Далбар хотуна буолар.
Сатабыллаах салайааччы туһунан сиһилии хаһыаппытыгар ааҕаарыҥ.
Ирина Корякина-Олесова уонна «Дуораанчык» уһуйаан коллектива.