“Араз” бааһынай хаһаайыстыба бэйэтин күүһүнэн үүт ситимин тарта

Амма улууһун бааһынай хаһаайыстыбалара аныгы кэми кытта тэҥҥэ хардыылыырга дьулуһаллар. Кинилэр араас бырагыраамаларга кыттан эмиэ көмөнү ылаллар. Ол гынан баран сорохтор ону күүппэккэ, бэйэлэрин күүстэринэн сайдыы суолун тутуһаллар. Чапчылҕан нэһилиэгэр баар “Араз” бааһынай хаһаайыстыба бу күннэргэ ынах ыыры чэпчэтэн үүт ситимин бэйэтин күүһүнэн киллэрдэ.

“Биһиги бааһынайдарбыт бу курдук бэйэлэрэ, хантан да үп-харчы ылбакка, бэйэлэрэ үлэлэрин чэпчэтиигэ үлэлэһэллэр. Ол курдук, холобура, Бөтүҥ нэһилиэгэр баар Полина Петровна Иванова салайааччылаах “Чолбон” бааһынай хаһаайыстыба ыанньык сайылыгар үүт ситимин бэйэтин күүһүнэн киллэрбитэ үһүс сылыгар барда. Манна киниэхэ 80-тан тахса ынахха икки ыанньыксыт үлэлиир. Үүт ситимин кэргэнэ, биллиилээх механизатор Михаил Егорович Иванов бэйэтэ таҥан оҥорбута. Онтон бу күннэргэ Михаил Егорович аны Оруджали Гардашовка үүт ситимин сайылыгар тардан киллэрдэ. Оруджали 120 ынахтаах. Күҥҥэ тоннаттан тахса үүтү ыан туттараллар. Онон кинилэр үлэлэрэ быдан чэпчээтэ. Бу курдук бааһынайдарбыт бэйэлэрин толкуйдарынан, сатабылларынан үрүҥ илгэни дэлэтиигэ, илии үлэтин чэпчэтии технологиятын киллэриигэ үлэлэһэллэриттэн үөрэбит”, — диэн улуус бааһынай хаһаайыстыбатын Ассоциациятын бэрэссэдээтэлэ Александра Цыпандина сырдатта.

“Амма олоҕо” хаһыат.

Читайте дальше