Улуус баһылыга Степан Кузьмин нэһилиэк баһылыктарын кытта оттооһуҥҥа бэлэм балаһыанньатын билсэр соруктаах сүбэ мунньаҕы ыытта. Болҕомто киинигэр уматыгынан хааччыллыы боппуруоһа турда.
Мунньахха кыттыыны нэһилиэк баһылыктара, хаһаайыстыба салайааччылара, тыа хаһаайыстыбатын ипсисэлиистэрэ, управление салайааччылара ыллылар. Тыа хаһаайыстыбатын управлениетын салайааччыта Ион Кононов билиҥҥи баар балаһыанньа туһунан сырдатта.
“Балаһыанньа байыаннай диэххэ наада. Биһиги улуус сайын устата от үлэтигэр 1000 тоннаҕа наадыйабыт. Мантан от ыйыгар 462 тонна сэлээркэни сайаапкалаабыппыт да, 50 тонна эрэ кэллэ. Юридическэй сирэйдээх хаһаайыстыбаларга биһиги бэйэбит үллэрэр эбит буоллахпытына, нэһилиэк дьаһалталара бааһынай хаһаайыстыбаларыгар бэйэлэрэ үллэрэллэр. Онно “Туймаада-нефть” тэрилтэни кытта дуогабардаһаллар. Ону улахан хаһаайыстыбаларбытынан түҥэттибит. Бу хаһаайыстыбалар управлениеттан сурук ылан, заправкаларга тиийэн уматыктарын ылыахтарын наада. Манна биири бэлиэтээн этиэххэ наада, сайаапканан кэлбит уматык барыта харчытыгар атыыланар. Ону босхо ылар курдук сорох дьон өйдөөбүт. Бу 50 тоннаны түҥэтиккэ хапсыбыт хаһаайыстыбалар бары атыылаһан ылан, дуогабардаһан баран биирдэ заправкаланналлар. Салгыы өссө төһө тонна кэлэрин билигин этэр кыах суох. Ол гынан баран эбии кэлиэҕэ диэн эрэнэбит. Олус айманар, туох да суох диэн дьону буккуйар наадата суох”, — диэн этэр тыа хаһаайыстыбатын управлениетын салайааччыта Ион Кононов этэр.
Ион Семенович бэлиэтээбитинэн, бу күннэргэ үүт харчытын кыра бырыһыана кэлбит. Дьиҥинэн үгүөрү соҕус кэлэрэ буоллар, саппаас чаас, уматык да ылыытыгар төһүү буолуо этэ диэн этэр. Улуус баһылыга Степан Кузьмин баһылыктарга туһаайан, туох баар күүһү -уоҕу күн бүгүн оттооһуҥҥа уурарга эттэ. Араас тэрээһиннэри тохтотон, окко күүскэ тахсарга сорудахтаата.
“Быйыл от үүнүүтүн кэрийэн көрдөххө, Бөтүҥтэн аллараа нэһилиэктэргэ, ол эбэтэр Сулҕаччыга диэри от үүнүүтэ үчүгэй диэххэ сөп. Онон бириэмэни мүччү туппакка, күүскэ киириэххэ наада. Онтон атын нэһилиэктэрбитигэр курааннаата. Ол да буоллар, үрэхтэргэ тахсан быйыл хайаатар да сыл тахсар оппутун булунар сорук туруорунан үлэни-хамнаһы ыытыахпытын наада. Сүөһүнү ахсаанын аччатыы туһунан боппуруос туруо суохтаах”, — диэн этэр Степан Николаевич.
Мунньахха кыттыыны ылбыт, иһитиннэриилэри оҥорбут нэһилиэк баһылыктара Болугуртан Андрей Петров, Сатаҕайтан Алексей Шишигин от үүнүүтэ мөлтөх диэн эттилэр. Хас биирдии баһылык билигин сүрүн кыһалҕата уматыгынан хааччыллыы. Онон араас суолу-ииһи булан, окко киирэргэ бары да нэһилиэктэр бэлэмнэр. Чакыр нэһилиэгин баһылыга Семен Григорьев иһитиннэрбитинэн, хас да бааһынай хаһаайыстыбалара эрдэттэн бэлэмнэнэн уматыктарынан хааччына сатаабыттар. Онон окко киирэргэ бэлэмнэр. Күн бүгүн улуус үрдүнэн 75 тонна от оттонно. Бу барыта кэтэх хаһаайыстыбалаахтар. Тэрээһиннээх хаһаайыстыбалар өссө саҕалыы иликтэр. Ол гынан баран “абааһы мунньаҕын” кэнниттэн тэрээһиннээхтик киириэхтээхтэр. Уматык боппуруоһа төһө да байыаннайдыы буолбутун иһин, быыс-хайаҕас булан, турар уустуктары туораан оттооһуну тэрээһиннээхтик ыытарга сорук турда.
“Амма олоҕо” хаһыат
Хаартыска: Августина Иванова