Дуобат тулууру, өй-санаа сааһыланыытын, бириэмэни сөпкө туһанарга, түргэнник толкуйдуурга үөрэтэр спорт биир бастыҥ көрүҥэ диэтэхпинэ сыыспатым буолуо. Аҕыйах хонуктааҕыта Амма Наахара орто оскуолатын бэтэрээн учуутала, дуобат умсугутуулаах хонуутугар үгүс оҕону хаамтарбыт, Амма Наахара нэһилиэгин бочуоттаах олохтооҕо Валерий Иванович Гаврильев үөрүүлээх сонуну иһитиннэрдэ. Ол курдук, Мэҥэ Хаҥалас улууһун Мэлдьэхситээҕи дуобат оскуолатын 5-с кылааһын бастыҥ үөрэнээччитэ Алгыс Матвеев Москуба уобалаһын Одинцов куоратыгар ыытыллыбыт Бүтүн Арассыыйатааҕы биирдиилээн бастыыр иһин 64 харахтаах нуучча дуобатыгар 14 саастарыгар диэри уолаттарга бастакы миэстэни ылан маастарга кандидат нуорматын толордо.
Алгыс алын сүһүөххэ дуобатынан дьарыктанаары ийэтин Александра Дмитриевна дойдутугар Өнньүөскэ кэлэн олорон бастыҥ тренер Валерий Гаврильевка үс сыл дьарыктаммыта. Туйгун үөрэнээччи, үчүгэй бэрээдэктээх, спортсмен киһи үүнэн эрэрин туоһулаан барыга көхтөөҕө, ырыа аргыстаах буолара. Уолчаан сүрэҕин баҕатынан дуобат албаһын, бастакы укулаатын баһылыырга элбэхтик үлэлээбитэ. Манна сайдарыгар убайын Дима Ефремовы кытары тэҥҥэ дьарыктанара, ини-биилэр күннэтэ ситиһии чыпчаалыгар эрэллээхтик дабайан испиттэрэ. Туйгун үөрэнээччи Алгыс Матвеев тренерин Валерий Иванович сорудаҕын барытын толороро. Бу бастыҥ тренер үлэлээбитин тухары дуобакка 8-с маастарга кандидаты иитэн таһаарыыта буолар. Валерий Иванович үөрэнээччитин ситиһиититтэн ыраахтан истэн үөрэн, мичилийэн инники үлэтигэр өссө күүс ыллаҕа. Билигин да “дуобат” диэн баран Амма Наахара оскуолатыгар тренери эккирэтэ сылдьар кыракый спортсменнар күннэтэ дьарыкка кэлэллэр, Алгыс Матвеев курдук ситиһии чыпчаалыгар дабайарга дьулуһаллар. Алгыспытыгар ис сүрэхтэн үөрэн туран туйгун үөрэҕи баҕарабыт. Иннин диэки баран ис, кыайыы аартыгын суола өрүү аһылыннын, ситиһиигэ сирдээтин диибит. Бастакы тренерын тэлбит суолунан үөрэ-көтө айаннаа! — диэн Амма Наахара олохтоохторо алгыспытын ыытабыт.
Ирина Корякина – Олесова.