Чакыр нэһилиэгэр быйыл 4-с төгүлүн педагогическай үлэ бэтэрээнэ Матвей Матвеев аатынан остуол тенниһигэр күрэх хас да бөлөҕүнэн арахсан ыытылынна. Күрэхтэһиини Чакыр нэһилиэгин олохтоох дьаһалтата, орто оскуола уонна Матвей Тихонович төрөппүт оҕолоро тэрийэн ыыттылар. Хаһан да буоларын курдук муҥутуур кыайыылааҕы быһаарыы бэрт тыҥааһыннаахтык ааста.
Күрэхтэһии хас да бөлөҕүнэн арахсан ыытылынна. Ол курдук 1-8 кылааска диэри, 9-11 кылааска диэри үөрэнээччилэр ортолоругар, эр дьоҥҥо уонна дьахталларга күрэхтэһии 17-49 саастарыгар диэри уонна 50-тан үөһээ саастаахтарга барда. Онтон муҥутуур кыайыылааҕы быһаарыыга чакырдар уонна Чакыртан төрүттээх дьон кыттыыны ыллылар. Күрэхтэһии балаһыанньатын быһыытынан саҥаттан саҥа дьону таһаарар инниттэн ааспыт сыллар муҥутуур кыайыылаахтара кыттыбыттар. Быйылгы күрэххэ уопсайа 39 кыттааччы кэлэн бэйэтин холонон, бириистээх миэстэҕэ киирэр иһин сытыы киирсиилэри көрдөрдүлэр. Түмүккэ 1-8 кылаастарга диэри уолаттарга бастакы миэстэни Болугуртан Женя Афанасьев, иккис миэстэни Дамир Кузьмин, үһүс миэстэни Чакыртан Айхал Николаев ыллылар. Кыргыттарга Болугуртан Сарыада Павлова бастакы, Николина Макарова иккис, Чакыртан Алиса Матвеева үһүс буоллулар. Салгыы 9-11 кылаас үөрэнээччилэрин ортотугар ыытыллыбыт күрэххэ кыайыылааҕынан Коля Никифоров таҕыста. Онтон кыргыттарга кыайыы өрөгөйүн Чакыртан Женя Борисова биллэ. Иккис миэстэ эмиэ Чакыртан Уйгулаана Максимова буоллулар.
Онтон улахан дьоҥҥо түмүк маннык буолла:18-51 саастарыгар диэри бөлөххө бастакы миэстэни дьахталларга Чакыртан Анна Григорьева, иккис миэстэни Амматтан Ангелина Прокопьева уонна үһүс миэстэни Чакыртан Наталья Матвеева ыллылар. Салгыы 51-тан үөһээ саастаахтарга бастакы миэстэ Амматтан Лидия Пестерева, иккис миэстэ Зоя Павлова уонна үһүс миэстэ Чакыртан Сардаана Александрова буоллулар. Эр дьоннор ортолоругар 17-49 саастаахтарга бастакы миэстэҕэ Соморсунтан Николай Кононов, иккис миэстэҕэ Амматтан Яков Павлов уонна үһүс миэстэҕэ Дьокуускайтан Иннокентий Кириллин таҕыстылар. Онтон 50-тан үөһээ саастаахтарга Амматтан Виктор Прокопьев кыайыыны ситистэ. Кини кэнниттэн иккис миэстэ Амма Наахараттан Прокопий Пахомов уонна үһүс миэстэ Амматтан Владимир Алексеев буоллулар.
Дьэ онтон муҥутуур кыайыылааҕы быһаарсыыга дьахталларга 74 саастаах Зоя Павлова инники күөҥҥэ таҕыста уонна үрүҥ көмүс киэргэл хаһаайката буолла. Эр дьоҥҥо муҥутуур кыайыылаах аатын олохтоох оскуола 11-с кылааһын үөрэнээччитэ Николай Никифоров ылан үөрүү өрөгөйүн биллэ уонна саха быһаҕынан наҕараадаланна. Маны сэргэ Абаҕа оскуолатын анал бирииһин Амма Наахараттан Ефремов Даян «Кыайыыга дьулуурун иһин» диэн анал ааты ылан тутта. Онтон «Кэскил» ХЭТ туруорбут анал бирииһэ, сүөһү төлкөтө буолар борооску, Болугур орто оскуолатын үөрэнээччитигэр Кузьмин Дамирга тигистэ.
“Аҕабыт Матвей Тихонович аатын үйэтитэр быйыл төрдүс төгүлүн ыытыллыбыт остуол тенниhигэр күрэхпит ситиһиилээхтик ааспытынан үөрэбит. Манна күүс-көмө буолбут Чакыр нэhилиэгин дьаhалтатыгар, нэhилиэкпит оскуолатын, култууратын дьиэтин, Абаҕа орто оскуолатын кэлэктииптэригэр, аҕабытын кытта бииргэ үлэлээн сылдьыбыт кэллиэгэлэригэр, үөрэппит оҕолоругар, Амматтан, Чурапчыттан аймахтарбытыгар, аҕабыт төрөөбүт дойдутун Лээги түмсүүтүгэр, чугас табаарыстарбытыгар, кэллиэгэлэрибитигэр барҕа махталбытын тириэрдэбит. Күрэххэ кыттыыны ылбыт оскуола оҕолоругар, Чакыртан төрүттээх биир дойдулаахтарбытыгар, ыраах Болугур, Өнньүөс курдук сиртэн айаннаан кэлэн күрэххэ көхтөөх кыттыыны ылбыт хамаандаларга эмиэ махтал! Кыттааччыларбытыгар өссө да элбэх ситиhиилэри баҕарабыт! Биирдиилээн бириистэрбитигэр улахан көмөнү оҥорбут өрөспүүбүлүкэбит спордун миниистиригэр Леонид Николаевич Спиридоновка, «Жемчуг» ювелирнай мастарыскыай салайааччытыгар Юрий Николаевич Ивановка, «Кэскил» ХЭТ дириэктэригэр Александр Алексеевич Кармановка эмиэ махталбыт муҥура суох!”, — диэн Матвей Тихонович оҕолоро, сиэннэрэ үтүө санааларын эттилэр.
“Амма олоҕо” хаһыат