Амматааҕы “Фаворит” бильярдыыр кулуупка икки күн устара бэтэрээннэр уонна эдэрдэр “троеборье” көрүҥэр бастыҥы быһаарыстылар.
“Бу “троеборье” диэн көрүҥү быһаардахха, ол аата оонньооччулар бастаан “комбинированная пирамида”, иккис динамичная пирамида” уонна бу икки көрүҥҥэ тэҥнэһэн хааллахтарына үһүс “свободная пирамида” диэн көрүҥҥэ киирсэллэр. Үөһээ сеткалар үс кыайыыга диэри, аллараа сеткалар, ол эбэтэр биир хотторуулаахтар икки кыайыыга диэри күн устата оонньоотулар. Барыта 14 киһи кытынна. Ол курдук Сатаҕайтан, Болугуртан, Чакыртан уонна Амматтан кэлэн күрэхтэстилэр.
Икки күннээх күрэх түмүгүнэн бэтэрээннэргэ, ол эбэтэр 50-тан үөһээ саастаахтарга кыайыылааҕынан Амматтан Игнатий Гаврильев таҕыста. Иккис миэстэни Болугуртан Иван Кисинянов уонна үһүс миэстэни Амматтан Алексей Пахомов, Михаил Неустроев ыллылар. Онтон эдэрдэргэ Амматтан Алексей Пахомов бастакы, Айсен Захаров иккис уонна үһүс миэстэҕэ Чакыртан Афанасий Максимов, Амматтан Валерий Кириллин таҕыстылар. Бу эдэрдэри кытта өссө икки бэтэрээн киирэн оонньоото. Ону сэргэ Мэҥэ Хаҥалас Төхтүрүттэн Василий Стручков кэлэн кытынна. Аны быйылгы сезоммутугар “омскай пирамида” диэн хаалла. Онно күрэхтэһиибит кус сезонун кэнниттэн ыытыллыаҕа”, — диэн “Фаворит” бильярдыыр кулууп салайааччыта Григорий Аммосов сырдатта.
“Амма олоҕо” хаһыат