Амма нэһилиэгэр “Фаворит” бильярдыыр кулуупка (сал. Г.Г. Аммосов) Чакыр нэһилиэгэ биир дойдулаахтара Федот Григорьев сырдык аатыгар иккис төгүлүн улуустааҕы бильярд күрэҕин бэрт сэргэхтик тэрийэн ыытта. Бириистэри нэһилиэк дьаһалтата, Федот Федорович чугас дьоно туруордулар.
Күрэххэ уопсайа аҕыс нэһилиэктэн, ол курдук Амма Наахараттан, Эмистэн, Алтантан, Сатаҕайтан, Соморсунтан, Болугуртан, Амматтан уонна Чакыртан 48 кыттааччы кэлэн күөн көрүстэ. Күрэх икки бөлөххө арахсан барда. Ол курдук эдэрдэргэ 22 уонна бэтэрээннэргэ 26 баар. Бу иһигэр түөрт кэрэ аҥар кэлэн эр дьону кытта тэҥҥэ кииристэ. Күрэх түмүгүнэн эдэрдэргэ 1 миэстэни Сатаҕайтан Атласов Даниил, 2 миэстэ Чакыртан Кириллин Мичил, 3 миэстэ Нестеров Афанасий уонна Сатаҕайтан Соловьев Петр буоллулар. Бэтэрээннэр ортолоругар кыайыылаах аатын Амматтан Пахомов Алексей ылла. Иккис миэстэҕэ Болугуртан Кисинянов Иван, үһүс миэстэҕэ Эмистэн Куприянова Галина уонна Амматтан Максимов Константин таҕыстылар.
Итини сэргэ анал ааттар олохтоннулар. “За серию шаров” — эдэрдэргэ Амма Наахараттан Пахомов Павел, бэтэрээннэргэ Максимов Константин ыланнар ботуруонунан наҕараадаланнылар. “Сухая победа” – эдэрдэргэ Алтантан Егор Дьячковскай, бэтэрээннэргэ Антипин Савва буолан сертификат туттулар. Итини сэргэ “Эдэр оонньооччу” ааты Алтантан Кириллин Валерий ылан газ плитанан, “Кырдьаҕас оонньооччу” ааты 76 саастаах Василий Ефремов ылан балыксыт наборунан , “За волю к победе” Болугуртан Устинов Петр ылан сертификатынан бэлиэтэннэ. Күрэххэ кыттыбыт түөрт кэрэ аҥардар Галина Куприянова, Нонна Ноговицына, Мария Заборовская “Алмазы Анабара” тэрилтэттэн анал бириис , Арика Степанова 3500 солкуобайдаах сертификат хаһаайыннара буоллулар. Бары чемпионнар, призердар кубогынан , мэтээлинэн грамотанан уонна сыаналаах бириистэринэн наҕараадаланнылар.
«Бэртээхэй күрэҕи сүүрэн-көтөн тэрийбит Чакыр нэһилиэгин баһылыгар Семен Николаевичка, Мичил Петровичка, Афанасий Афанасьевичка, Федот Федорович Григорьев ийэтигэр, балтыгар , быраатыгар, убайдарыгар, табаарыстарыгар уолларын үтүө аатын үйэтитэн бильярд бэртээхэй бырааһынньыгын бэлэхтээбиккитинэн улахан махтал буолуохтун. Быйыл Соморсун нэһилиэгэ аан бастакытын кэлэн кытынна. Онон инникитин бу курдук кэлэн көхтөөхтүк кыттыахтара диэн эрэнэбит”, — диэн күрэх кылаабынай судьуйата Игнатий Гаврильев сырдатта.
“Амма олоҕо”хаһыат