Амма нэһилиэгин “Фаворит” бильярдыыр кулуубугар Аан дойду дьахталларын күнүн көрсө бэрт сэргэх тэрээһин ыытылынна. Бильярды сэҥээрээччи уонна оонньооччу күүстээх аҥардар спорт бу көрүҥэр оонньуу сылдьар кэрэ аҥардарыгар умнуллубат бэлэҕи оҥордулар.
Аан дойду дьахталларын күнүн көрсө ыытыллыбыт күрэххэ Амма, Эмис, Амма Наахара, Покровка нэһилиэктэриттэн барыта 10 кэрэ аҥар кэлэн кииристэ. Оонньуу “свободнай пирамида” көрүҥүнэн барда.
“Манна биһиги бильярдка уопуттаах уонна саҥа оонньооччулар диэн көрдүбүт. Ол эбэтэр биирдии пара биир чаас устата киирсэллэр, уопуттаах кыттааччы уопута суоҕу кытта киирдэҕинэ 9 шарга диэри, онтон утарылаһааччыта 7 шарга диэри оонньуур. Онтон икки уопуттаах оонньооччу кииристэҕинэ, иккиэн 8-тыы шарга диэри киирсэллэр. Иккилии кыайыыга диэри оонньоотулар. Бу уон оонньооччуттан уопуттаахтарынан, куруутун кэлэн күрэхтэһиигэ күүстээх аҥардары кытта күрэхтэһэр Эмистэн Галина Куприянова, Амматтан Аграфена Трифонова уонна Покровкаттан Софья Рахменкулова буолаллар. Онтон атыттара саҥа бильярдка киирсэ, оонньуу сылдьаллар. Киирсии бэрт тыҥааһыннаах буолла. Ордук бастакы миэстэни былдьаһыы сытыытык барда. Күүстээх аҥардар кыргыттарбытыгар “Күндүл” ювелирнай фирматтан харысхал бэлэхтээтибит уонна бырааһынньыктааҕы торт ылан, сандалы тардан күндүлээтибит. Бу күн кинилэр бэйэлэрэ оонньоотулар.
Маны сэргэ кэргэним Альбина Александровна бильярд спордун өрө тутар кэрэ аҥардарга анаан эмиэ “Күндүл” фирматтан түөрт кэмпилиэк сахалыы түгэхтээх ытарҕалары бириис быһыытынан туруорда. Онон киниэхэ федерациябыт аатыттан махтал тылларын этэбит”, — диэн “Фаворит” кулууп салайааччыта Григорий Аммосов сырдатар.
Дьэ түмүккэ аан бастакытын дьахталлар ортолоругар ыытыллыбыт улуустааҕы күрэх кыайыылаахтара кимнээх буоллулар. Ол курдук үһүс миэстэни Амматтан Ньургуйаана Шестакова уонна Покровкаттан Софья Рахменкулова, иккис миэстэни Эмистэн Нонна Ноговицына уонна чемпион үрдүк аатын Амма Наахараттан Мария Заборовская ыланнар, уопуттаах оонньооччулары кэннилэригэр хааллардылар.
“Амма олоҕо” хаһыат