Аҕыйах хонугунан ыам ыйын 1 күнүн көрсөбүт. Аан дойду үлэһиттэрин сомоҕолоһууларын уонна ыам ыйын 1 күнүн бэлиэтиир күҥҥэ урукку кэмтэн үлэни өрө тутарбыт. Бу күн Амма Наахара нэһилиэгэр түөлбэлэринэн субуотунньукка тахсыахтара.
Амма Наахара нэһилиэгэр олохтоох дьаһалта ыам ыйын 1 күнүн нэһилиэккэ Ырааһырдыы күнүнэн биллэрбитэ. Ол дьаһал чэрчитинэн түөлбэлэр олбуордарын хомунан, бу күн уулуссаларыгар ыраастааһыҥҥа субуотунньук тэрийиэхтэрэ. Манна балаһыанньанан түөлбэлэртэн субуотунньукка төһө киһи тахсыбыта, хомуллан кутуллубут бөх куулун ахсаана, хас күн үлэ ыытыллыбыта бэлиэтэнэр. Бөхтөөх куул чөмөхтөнөн тутатына тиэллэн бөх тоҕуллар аналлаах сиргэ тиэйиллиэ. Онтон Үлэ күнүн көрсө тэрилтэлэр тиэргэннэрин хомунан эрэллэр. Ол курдук муус устар ый биир чаҕылхай күннээх, күөх халлааннаах, ол эрээри тыаллаах күнүгэр барыга көхтөөх, үлэни уһата-кэҥэтэ барбат «Үлэбитигэр бырааһынньык курдук»-диэн девизтаах «Дуораанчык» уһуйаана субуотунньук тэрийдэ.
Хаһаайыстыбаннай үлэни тэрийээччи Февронья Иванова салайыытынан уһуйаан тиэргэнэ уонна тулалыыр чугас суола хомуллан араас өҥнөөх былааҕынан киэргэйэн Эйэ, Саас, Үлэ бырааһынньыгын үөрэ көрсөргө симэннэ.
Бу бырааһынньыгы «Дуораанчык» күргүөмүнэн бэлиэтииргэ, түмсүүлээх буолууну, сомоҕолоһууну көрдөрөргө бастакынан бэлэм буолла. “Хайдах хаһаайын олороро тиэргэнтэн көстөр” диэн норуот муударай этиитэ баар. Уопуттаах салайааччы Полина Кононова салайар уһуйаанын тиэргэнэ өрүү ыраас, уурбут-туппут курдук оҥоһуллан, хомуллан турар буолар. Маннык үтүө суобастаах, туруу үлэһит дьон баар буолан биһиги нэһилиэкпит, улууспут, өрөспүүбүлүкэбит, дойдубут сайдар, чэчириир.
Ирина КОРЯКИНА-ОЛЕСОВА