Улууспут хаһыатын сайтыгар нэһилиэктэргэ флюммам нэһилиэктэринэн сылдьан үлэлээбитин, элбэх киһи ФЛГ көрүүнү барбытын туһунан ааҕан сэргээбиппит. Аны дьэ Эмис нэһилиэгэр кэлэн икки күн устата флюмамм үлэлээн, нэһилиэк олохтоохторо ханна да айаннаабакка миэстэтигэр флюрографияны аастыбыт.
Бу икки күн устата 14 саастарын ааспыт 14 оҕо, 79 улахан киһи ФЛГ аппаракка түстэ. Дэриэбинэбит төһө да кыра буоллар, Куду күөлүн тула, “Чэчир”, “Умсааннаах” түөлбэлэринэн киэҥ сири тайаан олоробут. Маны таба өйдөөн олохтоох дьаһалтабыт массыыната, эдэркээн суоппар уолбут Андрей Смирнов дьиэҕэ олорор кырдьаҕастары таһан, ытык кырдьаҕастарбыт сылайбакка-элэйбэккэ кэлэн түстүлэр. Нэһилиэнньэҕэ утары баран көмөлөспүт баһылыкпытыгар Прокопий Бубякиҥҥа, суоппарга Андрей Смирновка, улууспут киин балыыһатын дьаһалтатыгар, бэйэбит балыыһабыт үлэһиттэригэр махталбыт муҥура суох.
Прасковья БУБЯКИНА, Эмис нэһилиэгин социальнай үлэһитэ