Дьокуускай куоракка айар талааннаахтары өссө үрдүккэ көҕүлүүр, кини талааннарыгар сүгүрүйэр биир суолталаах тэрээһининэн Алампа бириэмийэтин туттарыы буолар. Биллэрин курдук бу улахан бириэмийэни Амма улууһуттан норуот суруйааччыта Дмитрий Наумов, киинэ искусствотыттан Дмитрий Давыдов, Семен Аманатов ылан тураллар. Онтон быйылгы бириэмийэни туттарыыга өссө биир Амма ааттанна.
Быйыл алтыс төгүлүн туттарыллар ускуустуба эйгэтин үлэһиттэригэр ананар Алампа аатынан бириэмийэни уон киһи араас номинацияларынан ылбытыттан, кинилэр ортолоругар биир дойдулаахпыт, Эмистэн төрүттээх Саха тыйаатырын артыыската, СӨ үтүөлээх артыыската Ирина Никифорова ааттанна. Ирина “Чаҕылхай артыыска” диэн ааты ылыан ылла.
“Ирина чахчы талааннаах артыыска. Кини бу идэтигэр олус бэриниилээхтик үөрэҕин бүтэриэҕиттэн үлэлии-хамсыы сылдьар. Иринаҕа бу бириэмийэни ылбытыттан бары олус үөрдүлэр, дьиҥ чахчы саха дьахтарын уобараһын итэҕитиилээхтик арыйар диэн эттилэр, сыаналаатылар. Онтон биһиги биир дойдулаахтара олус диэн киэн тутуннубут. Ирина чахчы да таһаарыылаахтык айар-тутар, бииртэн биир уобарастары арыйар. Тыйаатыры таһынан саха киинэлэригэр, “Саха” көрдөрөр-иһитиннэрэр хампаанньа сериалларыгар элбэхтэ уһуллан көрөөччүлэр сэҥээриилэрин ылар. Ону сэргэ “Тэтим” араадьыйатыгар уус ураннык ааҕан истээччилэргэ сөбүлэтэр, долгутар. Биһиги кинини кытта ыкса сибээстээхтик үлэлиибит. Ирина ис иһиттэн иэйэн-куойан ааҕыылара саха араадьыйатын «Көмүс пуондатыгар» кичэллээхтик харалла сытан үгүс көлүөнэ дьоҥҥо туһалыы, иһиллэ туруоҕа. Онон өссө төгүл талааннаах кыыспытын Алампа аатынан бириэмийэ лауреата буолбутунан истиҥник эҕэрдэлиибит. Инникитин да айа-тута турарыгар баҕарабыт”, — диэн “Тэтим” араадьыйа эрэдээктэрэ Татьяна Степанова санаатын үллэһиннэ.
Чаҕылхай артыысканы, биир дойдулаахпытын Ирина Никифорованы саха литэрэтиирэтин төрүттээччи, суруйааччы, драматург, суруналыыс Анемподист Софоронов — Алампа аатынан бириэмийэни ылбытынан иһирэхтик, астынан, долгуйан туран эҕэрдэлиибит уонна саҥа хатыламмат уобарастары айа-тута тур диэн алгыспытын аныыбыт.
“Амма олоҕо” хаһыат