Амматааҕы Л.В. Киренскэй аатынан лиссиэй 11-с кылааһын үөрэнээччитэ Надя Дьяконова саха фольклорун кыра эрдэҕиттэн сэҥээрэр. Эдэр олоҥхону толорооччу бу жанрынан интэриэһиргиэҕиттэн улууһун, нэһилиэгин чиэһин үгүстүк көмүскээн кэллэ. Быйылгы Олоҥхо ыһыаҕар эмиэ ситиһиилээхтик кыттан Ил Түмэн дьокутаата Василий Николаев олохтообут анал бириэмийэтин туппута.
“Былырыын Аммабытыгар ыытыллыбыт Олоҥхо ыһыаҕар эмиэ ситиһиилээхтик кыттан, быйыл, хайалаах Нерюнгри улууһугар эмиэ баран кэлбитим. Онно Амма улууһун аатыттан «Олоҥхо оспот омоон суолларынан» диэн олоҥхо күрэһигэр ситиһиилээхтик кытынным. Мин бэйэм олоҥхонон 6 сааспыттан дьарыктаммытым. Онно миигин Софронова Анисия Даниловнага уһуйбута. Номнуо 11 сыл ааспыт. Күрэскэ биир дойдулаахпыт Устин Гаврильевич Нохсооров «Сыанаканан сыһыылаах, холуопканан хонуулаах сылгы сүөһү оҕото Дыырай Бэргэн» диэн олоҥхотуттан быһа тардан толорбутум. Билигин Кириллина Анна Михайловнаҕа уонна Григорьева Виктория Георгиевнаҕа дьарыктанабын. Мин махталбын тириэрдиэм этэ Саха сирин норуодунай депутатыгар Василий Петрович Николаевка.
Кини мин толоруубун сыаналаан бэйэтэ 50 000 солкуобайдаах бириэмийэ олохтоон туттаран үөрүүм улахан. Киниэхэ баҕарыам этэ кытаанах доруобуйаны, үлэтигэр үрдүктэн үрдүк ситиһиилэри. Ылбыт бириэмийэбин айар үлэбин салгыы сайыннарарга туттуом, өссө да инникитин дьарыкпын бырахпакка араас күрэхтэргэ кытта туруом. Бу маннык өйөбүллэр биһиэхэ олус наадалар, салгыы сайдарбытыгар тирэх буолаллар. Ону кытта истиҥ тылларбын уһуйааччыларбар, Виктория Георгиевнаҕа уонна Анна Михайловнаҕа аныыбын”,- диэн эдэр кэскиллээх олоҥхону толорооччу Надя Дьяконова.
“Амма олоҕо” хаһыат