Дьокуускай куоракка атырдьах ыйын 21 күнүттэн саҕалаан үөрэх үлэһиттэрин атырдьах ыйынааҕы сүбэ мунньахтара ыытылла турар. Бу саҕаланаары турар үөрэх дьылыгар саҥа соруктары туруорар, былааннары торумнуур, баар кыһалҕалары дьүүллэһэр, ырытыһар, уопут атастаһар былаһааккаҕа Амма улууһун үөрэҕин салаатын салайааччыта Николай Ларионов салайааччылаах улахан дэлэгээссийэ кыттыыны ылар. Биһиги кинини кытта сибээскэ тахса сырыттыбыт.
“Амма улууһуттан уопсайа 85 үөрэх тэрилтэлэрин салайааччылара, методистара, эбии үөрэхтээһин педагогтара кыттыыны ыла сылдьабыт. Быйылгы атырдьах ыйынааҕы сүбэ-мунньах элбэх үөрэтэр, да санаа да атастаһар былаһааккалардаах. Ол курдук холобура “Үөрэх эйгэтин тирээн турар боппуруостара”, “Үөрэх эйгэтэ уонна дьиэ кэргэн”, “Үөрэх эйгэтэ уонна технология”, “Үөрэх эйгэтэ уонна производство”, “Үөрэх эйгэтэ уонна наука” курдук олус киэҥ, үөрэхтээһин сайдыытыгар туһуламмыт былаһааккалар бааллар.
Ону сэргэ семинардар, маастар-кылаастар, “төгүрүк остуоллар”, араас кэпсэтиилэри ыытар былаһааккалар уонна да атын элбэх туһалаах тэрээһиннэр былаан быһыытынан бардылар уонна бара да тураллар. Биир улахан тэрээһининэн Юрий Гагарин аатынан култуура уонна искусство киинигэр мунньахпыт пленарнай чааһа буолла. Манна Ил Дархан Айсен Сергеевич Николаев кыттан, биһиэхэ үөрэх хаачыстыбатын тупсарыыга, аныгыы сайдыыга сүрүн соруктары туруорда. Пленарнай мунньахха улуус баһылыктарын солбуйааччылара, үөрэх тэрилтэлэрин салайааччылара, кинилэр солбуйааччылара уонна үөрэх салаатын үлэһиттэрэ кыттыыны ыллылар.
Маны сэргэ билэргит курдук Ил Дархан 13 оскуолаҕа автобус күлүүстэрин туттарда. Онно биһиги улуустан биир улахан оскуолабыт, Амма 1 нүөмэрдээх оскуолата 22 миэстэлээх ПАЗ автобуһу ылла. Бу пленарнай мунньахха биһиги улуустан “Хатыҥчаана” уһуйаан физкультураҕа инструктора Рустам Сергеевич Сергеев оскуолаҕа киириэн иннинээҕи саастаах оҕолору кытта үлэ, бэйэтин үлэтин уопутун уонна Казань куоракка Бүтүн Арассыыйатааҕы күрэххэ кыттыытын туһунан иһитиннэрии оҥордо. Маны сэргэ бэҕэһээ үгэс быһыытынан үөрэх үлэһиттэрэ эти-хааны чэбидигирдэ волейбол күрэҕин ыыталлар. Манна биһиги улуус үһүс бириистээх миэстэни ыллыбыт.
Ону кытта өссө хамаандабыт чилиэнэ, Алтан орто оскуолатын дириэктэрэ Александр Егорович Шишигин «Лучиший нападающий» номинацияны ылла, бирииһинэн наҕаардаланна. Бастакы миэстэни үөрэх министиэристибэтин хамаандата уонна иккис миэстэҕэ Уус Алдан улууһун хамаандата таҕыстылар. Сүбэ мунньахпыт салҕанар. Бүгүн толору күн үлэлиибит. Манна ылбыт үөрэхпитин. соруктары улууспутугар балаҕан ыйыгар ыытыллар сүбэ-мунньахпытыгар дьүүллэһиэхпит, үлэһиттэрбитигэр тириэрдиэхпит”, — диэн Николай Александрович кылгастык сырдатта.
“Амма олоҕо” хаһыат