Амма нэһилиэгин “Фаворит” бильярдыыр кулуупка 50-гар уонна 50 -тан үөһээ саастаахтарга икки күннээх күрэх ыытылынна. Кыттааччылар “омская пирамида” диссипилиинэҕэ бастыҥы быһаарыстылар.
“Бу диссипилиинэ “свободнай пирамида” оонньуу курдук. Күрэхтэһээччилэр бириэмэтэ суох үс кыайыыга диэри бараллар. Манна саамай интэриэһинэйэ, киирсиилээҕэ диэн ахсыс шаригынан, хайаатар да “кыһыл бөтүүк” киириэхтээх. Ол киирдэҕинэ оонньуу бүтэр. Сорох оонньооччулар сэттэлэрин киллэрэн баран, дьэ ол “кыһыл бөтүүгү” кыайан киллэрбэккэ, айманыы бөҕө буолааччы. Бильярдистар биир үөрүүлээх сонуммутунан, Дьокуускай куоракка өрөспүүбүлүкэ сүүмэрдэммит хамаандатын чилиэнэ Виктор Андреев 60 сааһыгар анаммыт турнир буолан ааста. Бу турнирга биһиги солбуллубат кылаабынай судьуйабыт Игнатий Гаврильев баран кыттыыны ылан кэллэ. Онно ыытыллыбыт турнирга элбэх рейтиннээх бильярдистар оонньообуттара. Кинилэри кытта Игнатий Иванович тэҥҥэ киирсэн үһүс бочуоттаах миэстэни ылан кубогынан, мэтээлинэн, грамотанан уонна сертификатынан наҕараадаланан кэллэ. Бу биһиги кулууппут үлэтин түмүгэ буолар диэххэ. Өссө тохсунньу ыйга Игнатий Иванович өрөспүүбүлүкэ турнирыгар “Лучшая восьмерка” киирэн спорт министиэристибэтин Бочуотунай грамотатынан бэлиэтэммитэ. Биһиги мантан олус үөрэбит уонна астынабыт”, -диэн “Фаворит кулууп дириэктэрэ Григорий Аммосов кэпсиир.
50-тан үөһээ саастаах бэтэрээннэргэ 17 киһи регистрацияны ааһан кииристэ. Манна үһүс бочуоттаах миэстэни Эмистэн Галина Куприянова ылла. Онтон дьэ кыайыылааҕы быһаарсыыга тыҥааһыннаах, унньуктаах уһун киирсии кэнниттэн Михаил Неустроев бастаата, кини кэнниттэн иккис миэстэ Болугуртан Иван Кисинянов буолла. Онтон 50-тан аллараа саастаахтарга уопсайа 12 киһи регистрацияны ааста. Манна бастакы миэстэни Амматтан Алексей Пахомов, иккис миэстэни 2- Чакыртан Мичил Кириллин, үсүһү Сатаҕайтан Петр Соловьев ылла.
“Ити курдук барыта холбоон 29 киһи оонньоото. Күрэхтэһии икки күн устата барда. Ол курдук кыайыылаахтар үөһээ сеткаҕа үс кыайыыга диэри уонна кыайтарыылаахтар, аллараа сеткаҕа икки кыайыыга диэри оонньоотулар.
Уһун киирсиилэр буоллулар. Өрөспүүбүлүкэҕэ ыытыллар күрэхтэһиилэр эмиэ маннык быраабыланан бараллар. Онон биһиги дьоммутун үөрэтэ таарыйа эмиэ маннык быраабыланан оонньууну тэрийдбит. Тоҕо диэтэр нэһилиэктэргэ баар остуолларга дьоммут ыксыы сылдьан, кылгас кэмҥэ киирсэллэр. Онон улахан күрэхтэһиилэргэ сылайан хаалаллар”, — диэн этэр Григорий Григорьевич.
“Омскай пирамида”диссипилиинэ кыайыылаахтара мэтээлинэн, сертификаттарынан наҕараадаланнылар.
“Амма олоҕо” хаһыат