Муус устар 25 күнүгэр буолбут Ил Дархан быһа эпиирин Амма улууһун уопсастыбаннай Сэбиэтин бэрэссэдээтэлэ Степан Бурнашев болҕойон иһиттэ уонна олус астыммытын бэлиэтээтэ.
“Мин Ил Дархан быһа эпиирдэрин көтүппэккэ истэбин. Өссө бэйэм боппуруос биэрэн турабын. Бэҕэһээ буолбут эпиири истэн астынным. Манна боппуруостарга эрэ эппиэт буолбакка, өрөспүүбүлүкэбит үлэтин сүнньүнэн барытын кэпсээтэ. Ол курдук холобура өрөспүүбүлүкэбит кэнники сылларга балысханнык сайдан иһэрин, алмааһы хостооһуҥҥа аан дойдуга бастакы миэстэҕэ, көмүһү хостооһуҥҥа иккис миэстэҕэ, чоҕу хостооһуҥҥа үһүс миэстэҕэ, ниэби уонна гааһы хостооһуҥҥа бэһис миэстэҕэ сылдьабыт. Маны олус үөрэ уонна долгуйа, киэн тутта иһиттим. Аны Ил Дархан аммалар быһа эпииргэ тахсан уоппут кыамтатын ыйытыыларыгар үлэ саҕаламмытын, ону олохтоохтор быйыл сайын Олоҥхо ыһыаҕар билиэхтэрэ, 2024 сылга 18 км усталаах линияҕа кыамтатын күүһүрдүү үлэтэ барыа диэн эттэ. Аны суолбут туһунан ыйытыахтаах этибит да, Айсен Сергеевич бу кыһалҕабытын бэркэ билэр буолан, тута Амматтан боппуруос киирбитинэн, бу хайысхаҕа үлэ хайдах бара турарын иһитиннэрдэ. Ол быһыытынан суолбутугар быйылгыттан саҕалаан асфаллааһын үлэтэ саҕаланан, 2028 сылга Амма суола барыта оҥоһуллуохтаах, асфалынан бүрүллүөхтээх диэн эттэ уонна ол үлэни ыыта сылдьар суол тутааччыларга эрэнэрин биллэрдэ. Быһатын бу буолбут эпииртэн биир бэйэм астынным ”, — диэн Степан Семенович этэн туран, бэйэтин тус санаатын үллэһиннэ.
“Амма олоҕо” хаһыат