Сулҕаччы нэһилиэгин тэрилтэлэрэ уот суох кэмиттэн саҕалаан бэйэлэрин сыһыарыллыбыт үлэ бэтэрээннэригэр, нэһилиэк кырдьаҕас олохтоохторугар көмө оҥордулар.
Ол курдук, Сулҕаччытааҕы ОДьКХ учаастагын үлэһиттэрэ (начальник Илья Христофорович Данилов) тыыл, үлэ бэтэрээнэ, кырдьаҕас механизатор Петр Никифорович Тарасовка балбааҕын тиэйдилэр. Сулҕаччы олохтоох дьаһалтатын эр бэртэрэ (баһылык Артем Германович Степанов) түмсэннэр үлэ бэтэрээннэрэ Мария, Николай Пудовтарга, Мирон Неустроевка муус тастылар, хаалаатылар.
Ити курдук кырдьаҕастарга көмөнү икки бөһүөлэк оскуолаларын үлэһиттэрэ эмиэ оҥордулар, холобур М.Н. Сибиряков аатынан Сэргэ-Бэс оскуолатын үлэһиттэрэ (директор Екатерина Алексеевна Христофорова) үөрэнээччилэрин кытта үлэ бэтэрээннэрэ Надежда, Михаил Елисеевтэргэ хотон хаарын түһэрдилэр. Онтон И.И. Константинов-Дэлэгээт Уйбаан аатынан Сулҕаччы орто оскуолатын үлэһит уолаттара(директор Иван Григорьевич Окороков) педагогическай үлэ бэтэрээнэ Клара Романовна Кириллинаҕа көмөлөһөн уһаайба хаарын тастылар.
Ити курдук нэһилиэк атын да тэрилтэлэрэ мантан саас шефтээх кырдьаҕастарыгар көмө оҥорорго бэлэмнэр.
Елена Попова.