Амматааҕы Н.С. Захаров-Сахаачча аатынан оҕо спортивнай оскуолатыгар биллэр суруналыыс, Сахаачча аатын киэҥ араҥаҕа таһаарыыга күүскэ үлэлэһэ сылдьар, СӨ култууратын үтүөлээх үлэһитэ Иван Ушницкайы кытта истиҥ көрсүһүү буолла.
Көрсүһүүнү Амма улууһун баһылыгын социальнай боппуруостарга солбуйааччы Ньургуйаана Илларионова салайан ыытта. Манна кыттыыны Сахаачча бииргэ үөрэммит доҕотторо, бииргэ төрөөбүттэрэ, Амматааҕы оҕо спортивнай оскуолатын тренердэрэ, спорт бэтэрээннэрэ ыллылар.
“Иван Петрович биһиги Сахааччабыт туһунан олус интэриэһинэй, дириҥ суолталаах кинигэ бэлэмнии сылдьар. Кини ол кинигэтин матырыйаалын булууга араас сирдэринэн командировкаҕа сылдьыбыт, Кавказка тиийэ. Онно Иван Петрович Сахааччаны кытта бииргэ эрчиллибит, доҕордоспут, кини кытаанах былчыҥнарын туппут-хатыспыт аан дойдуга биллэр күүстээх бөҕөстөрүн уонна Сахаачча чугас доҕотторун кытта көрсөн наһаа үчүгэй кэпсэтиилэри суруммут. Сахаачча туһунан ыйыталастаҕына, кини туһунан кинигэ оҥороору сылдьабын, матырыйаал хомуйабын диэтэҕинэ, дьон барыта өрө көрө түһэрин, харахтара уоттанарын астына бэлиэтиир. Онон биһиги Сахааччабытын күн бүгүҥҥэ диэри истиҥник саныыр дьон баалларын үөрэ, долгуйа иһиттибит. Бу Иван Петрович бэлэмнии сылдьар кинигэтигэр дьиҥ алтыспыт дьон санаалара киирэн, этэргэ диэри “үһү” диэн буолбакка, “этэ” диэн суруллуо. Онон бу ураты ис хоһоонноох кинигэ тахсыытыгар бары спорду сэҥээрээччилэр, Амма улууһун дьоно-сэргэтэ, улуус дьаһалтата күүс-көмө буолуохтара диэн Иван Ушницкай эрэллээх. Кинигэни кэлэр сылга, Сахаачча аатын сүгэр оҕо спортивнай оскуолата тэриллибитэ 40 сылыгар анаан таһаарар киһи олус бэртээхэй буолуо этэ. Амма спортка оскуолата 1985 сыллаахха аатырбыт тренер Михаил Скрябин саҕалаан тэриллэн төһөлөөх аммаларын, Саха сирин аатырдыбыт тустууктар үүнэн-сайдан тахсыбыттара буолуой. Сахаачча оҥорбут кыайыыта хатыланар. Ол курдук оскуола ситимнээх үлэтин түмүгэр быйыл Олимпиадаҕа Амма спортивнай оскуолатын ааспыт үс ыччаттарбыт баран кыттыбыттара историяҕа буола илик түгэн буолар. Бу барыта Амма тустуута инникилээҕин көрдөрөр. Үрдүк ситиһиилэргэ суолдьут сулус буолан сирдии турар Сахаачча туһунан кинигэ күн сирин көрөн Саха сирин спорда сайдыытыгар төһүү күүс буолуоҕа”, — диэн Сахаачча аатынан оҕо спортивнай оскуолатын дириэктэрин солбуйааччы Виктория Владимирова сырдатта.
Кэпсэтиигэ кыттыбыт дьон бары кинигэ тахсыытын сэҥээрдилэр уонна хайаатар да күн сирин көрөрүгэр эрэллэрин биллэрдилэр. Бэйэлэрин санааларын СӨ үөрэҕириитин үтүөлээх үлэһитэ , СӨ государственнай сулууспатын бэтэрээнэ Анастасия Божедонова, улуустааҕы спорт управлениетын салайааччыта Дмитрий Наумов, спортивнай оскуола аатыттан Виктория Владимирова, тустуу тренерэ Кирилл Павлов, бииргэ үөрэммит доҕотторо Василий Кузьмин, Анатолий Алексеев эттилэр. Көрсүһүү кэнниттэн Сахаачча түмэлин киирэн көрдүлэр.
“Амма олоҕо” хаһыат