А.П. Рязанскай аатынан Соморсун орто оскуолатын түмэлэ, нэһилиэк аҕам саастаахтарыгар аһаҕас аан күнүн тэрийдэ. Аҕам саастаахтарбыт түмэли бэркэ сэргии, астына көрдүлэр.
Оскуола түмэлин уопуттаах педагог, кыраайы үөрэтээччи, Арассыыйа, Саха сирин үөрэҕириитин туйгуна Анисия Готовцева ис сүрэҕиттэн кыһаллан үлэлэтэр. Түмэл үлэтин улуус оскуолалара, нэһилиэккэ, оскуолаҕа кэлбит ыалдьыттар көрөн сэҥээрэллэр. Анисия Гаврильевна нэһилиэк, улуус тэрээһиннэригэр араас ис хоһоонноох быыстапкалары тэрийэн, туруорар. Аан дойдуга түмэл күнүнэн нэһилиэк аҕам саастаахтарыгар анаан күн тэрийдэ. Ытык дьоммут түмэли көрөн, элбэҕи анааран олус сэргэхсийдилэр. Өссө Галина Заборовская, Мария Неустроева түмэлгэ экспонат бэлэх ууннулар. Сайыны көрсө алаадьынан күндүлэнэн, санааларын үллэстиннилэр.
«Бүгүн оскуола түмэлин көрөн олус сэргэхсийдибит. Дириҥ ис хоһоонноох, элбэх баай экспонаттааҕын, ол иһигэр олус сэдэх экспонаттар баалларын көрөн соһуйдубут. Түмэл хоһо кыараҕас эбит. Саҥа оскуолаҕа киэҥ ис хоһоонноох түмэл баар буолуо диэн эрэнэбит. Биһиги курдук баай историялаах нэһилиэкпитигэр хайаан да түмэл тэриллэрэ улахан суолталаах эбит”, — диэн Галина Заборовская санаатын үллэһиннэ.
Барыта 17 кырдьаҕас түмэли көрөн, сэргэхсийэн, Анисия Гаврильевнаҕа бэйэлэрин истиҥ махтал тылларын анаатылар.
Надежда БЕЛОЛЮБСКАЯ