Дьокуускай куоракка “Үргэл” галереяҕа “Саргылаах ситим” диэн быыстапка турда. Бу Нам педагогическай колледжын 1980 сыллаахха бүтэрбит выпускниктара үбүлүөйдээх быыстапкалара буолар. Үбүлүөйдээх быыстапкаҕа тарбахтарыгар талааннаах биир дойдулаахтарбыт оҥоһуктара эмиэ киирдилэр. Тэрээһиҥҥэ Амма улууһун баһылыгын социальнай боппуруостарга солбуйааччы Ньургуйаана Илларионова сылдьан эҕэрдэ тылын тириэртэ.
“Биир дойдулаахпыт Раиса Степанова бу тэриллибит быыстапкаҕа биир сүрүн күүс буолбутун бэлиэтиэххэ наада. Ону сэргэ быыстапкаҕа эмиэ биир тарбахха баттанар талааннаах далбарбыт, норуот маастара улуу олоҥхоһуппут Үстүүн Нохсоороп сиэн балта Ульяна Нохсорова үлэлэрэ эмиэ турдулар. Раиса Васильевна бииргэ төрөөбүт балтынаан Марианна Васильевна Ефимовалыын иккиэн айар куттаах дьоннор. Ол курдук Марианна Васильевна билэргит курдук өрөспүүбүлүкэҕэ киэҥник биллибит “Сир симэҕэ” диэн Арассыыйа көрдөрүүлээх үҥкүүтүн ансаамбылын салайааччыта, Раиса Васильевна төрүт ииһинэн дьарыктанар тарбаҕар талааннаах иистэнньэҥ, 10 тахса араас таһымнаах быыстапкалар кыттыылаахтара, Өймөкөөҥҥө, Аммаҕа, Нерюнгрига уонна да атын Олоҥхо ыһыахтарыгар ыытыллар норуот талааннарын күрэҕэр куруутун бириистээх миэстэлэри ылар. Холобура, Өймөкөөҥҥө ыытыллыбыт ыһыахха «Көмүс сүүтүк» анал аат хаһаайката буолбута. Раиса Васильевна икки толору ат симэҕин оҥорон олус улахан үлэни толорбута. Онтон биирэ Монголияҕа аан дойдутааҕы быыстапкаҕа туруоруллубута, сахалыы дьахтар соно Москваҕа эмиэ аан дойдутааҕы быыстапкаҕа үрдүк биһирэбили ылбыта. Быйылгы сылга Сунтаарга ыытыллыбыт Кыыл Уолун 125 сааһыгар анаммыт ыһыахха атын кэмпилиэгэ иккис миэстэни ылбыта, Нерюнгрига ыытыллыбыт Олоҥхо ыһыаҕар Раиса Васильевна тикпит дьахтарын соно үһүс миэстэҕэ тиксибитэ. Быыстапка үөрүүлээх аһыллыытыгар галерея дириэктэрэ, норуодунай худуоһунньук Юрий Спиридонов, «Юные якутяне» оҕо эбии үөрэхтээһин киинэ, Намнааҕы педагогическай колледж салалталара эҕэрдэлээтилэр.
Быыстапка тэрийээччитигэр, киэн туттар выпускниктарыгар Раиса Степановаҕа Махтал суруктарын, сибэкки дьөрбөлөрүн туттардылар. Маны сэргэ үөрэппит учууталлара Намтан, Мэҥэ Хаҥаластан, Дьокуускайтан эҕэрдэлээбиттэрэ олус долгутуулаах түгэнинэн буолла. «Саргылаах ситим» быыстапка «Үргэл» галереяҕа ый устата турар. Биир дойдулаахтарбытын бу күннэргэ быыстапканы көрөргүтүгэр ынырабыт. Биһиги Аммабыт айар талааннаах далбардарынан киэн туттабыт”, — диэн Ньургуйаана Ивановна сырдатта.
“Амма олоҕо” хаһыат