Бүгүн, алтынньы 24 күнэ, бильярд оонньууну таптааччылар күннэринэн биллэр. Бу оонньуу историяҕа биллэринэн аан бастаан Кытайга оҕолор палочкаларынан лузаларга шариктары киллэрэр оонньууларын быһыытынан төрөөн тахсыбыт. Амма улууһун бильярдын сөбүлээччилэрэ бу күнү көрсө сезоннарын астылар. Бу күн бэтэрээннэр оонньоотулар.
“Биһиги “Фаворит бильярдыыр кулууппут 2026-2027 сыллар сезоннарын бэтэрээннэр ортолоругар күрэхтэһиинэн аста. Барыта 55 саастарыттан үөһээ саастаах 11 кыттааччы кэлэн оонньоон бастыҥы быһаарыстылар. Оонньуу “свободнай пирамида” көрүҥэр барда.
Тыҥааһыннаах күн устата ыытыллыбыт оонньуу түмүгүнэн кыайыылааҕынан Амматтан Игнатий Гаврильев, иккис миэстэ Болугуртан Савва Антипин, үһүс миэстэ Амматтан Константин Максимов уонна Болугуртан Иван Кисинянов буоллулар.
Бары бильярд спордун сэҥээрэн оонньооччулары, кулууппут чилиэннэрин бүгүҥҥү бырааһынньыкпытынан истиҥник эҕэрдэлиибин. Сезон аһылынна. Онон мантан кыһын араас күрэхтэһиилэр ыытыллыахтара, онно бары кэлэн көхтөөхтүк кытталларыгар ыҥырабыт. Бу умсугутуулаах, киһиттэн тулууру, кыраҕы хараҕы, чуолкай хамсаныыны эрэйэр оонньууга саҥа оонньооччулары күүтэбит”, — диэн этэр “Фаворит” кулууп салайааччыта Григорий Аммосов.
“Амма олоҕо” хаһыат