Сарсын алтынньы 30 күнүгэр Аммаҕа Арассыыйа Дьоруойа Александр Находкин ыалдьыттыаҕа. Дьоруойу көрсүү былаана хайдах буолуой? Бу туһунан улуус баһылыгын социальнай боппуруостарга солбуйааччы Николай Ларионов билиһиннэрдэ.
“Сарсын биһиги улууспутугар биир бэлиэ түгэн күүтүллэр. Ол курдук өрөспүүбүлүкэбититтэн 14 киһинэн Арассыыйа Дьоруойун үрдүк аатын ылбыт Александр Находкин кэлэр. Кини бүгүн бэйэтин биир дойдулаахтарыгар, Уус Алдан улууһугар ыалдьыттыыр. Уус алданнар бэрт тэрээһиннээхтик көрсө сылдьаллар. Биһиги эмиэ хорсун буойуну тэрээһиннээхтик көрсүөхтээхпит. Онон анал былаан оҥоһуллунна. Ол курдук кини сарсыарда кэлэн баран улуус баһылыга Степан Николаевич Кузьмины кытта көрсүө. Онтон улуус дьаһалтатын аактабай саалатыгар анал байыаннай дьайыы бэтэрээннэрин, анал байыаннай дьайыы кэмитиэтин волонтердарын, буойуннар дьиэ кэргэттэрин, ону сэргэ тэрилтэ салайааччыларын, уопсастыбаннаһы кытта көрсүһүүтэ буолуо. Ол кэннэ Амма 1№-дээх оскуолатыгар сылдьан юнармеецтары кытта көрсөн “Хорсун санаа уруогун” ыытыа. Александр Егорович биир бэлиэ түгэнинэн Эмис оскуолата үгэскэ кубулуйбут улуус оскуолатын оҕолорун муҥхаларын көрүө, кыттыыны ылыа”, — диэн Николай Александрович сырдатта.
Аммабытыгар бу иннинэ Арассыыйа Дьоруойдара Александр Колесов, Филипп Евсеев уонна Алексей Петров кэлэн барбыттара.
“Амма олоҕо” хаһыат