Амма улууһун тыатын хаһаайыстыбатын управлениетын салайааччыта Ион Кононов бэлиэтииринэн күн бүгүн үлэтин саҕалаабыт “Абаҕаагро” собуота оҥорон таһаарар бородууксуйатын амсайбыт дьон сөбүлээтилэр. Онон собуот инникитин үлэтин өссө күүһүрдэн, үс ыйга харайыллар үүтү оҥорон таһаарыыга үлэлэһэр.
“Строд аатынан хаһаайыстыба “Илгэ” ХЭТ иһинэн тэриллибит “Абаҕаагро” үүт бородууксуйаларын оҥорон таһаарар собуота муус устар ортотуттан саҕалаан үлэлии олорор. Собуот үлэҕэ киирэригэр хаһаайыстыба күүскэ үлэлэстэ. Билэргит курдук бу собуот улуустарга бэриллибит тыа хаһаайыстыбатын боломуочуйаларын көмөтүнэн, ол эбэтэр кыра кыамталаах тэрилтэлэри тэрийиигэ үбү-харчыны көрөр бырааптанаммыт, үлэҕэ киирдэ диэххэ наада. Биһиги улууспут салалтатын кытта сүбэлэһэн, элбэх үүт бородууксуйаны таһаарар “Илгэ” хааччахтаммыт эппиэтинэстээх тэрилтэ үүт аспын бэйэбит оҥорон таһаарыа этибит диэн баҕаларын учуоттаан, субсидия биэрбиппит.
Билигин манна 1,5 туонна үүт күннэтэ араас бородууксуйа буолан тахсар. Ол курдук Амма нэһилиэгин маҕаһыыннарыгар үүт, чөчөгөй, йогурт, суорат, арыы кэлэн дьон хото атыылаһан эрэриттэн, бородууксуйа хаачыстыбата үчүгэй бэлиэтииллэриттэн үөрэбит.
Сайын манна оборудование толору үлэлээн, үс ый устата харайыллар тетрапакеттаах үүт тахсыа. Дьэ оччотугар бу собуот кыаҕын өссө улаатыннаран, аттынааҕы нэһилиэктэртэн эмиэ үүт тутан, бородууксуйата дэлэйиэ. Өссө манна 40 тонналаах холодильник кэлэн туруохтаах. Биһиги улуус бу кыра кыамталаах тэрилтэлэри тутууга салгыы үлэлэһэн, өссө үс хаһаайыстыба маннык собуот тутар баҕалаах. Оччотугар улууспутугар доруобай күрэстэһии олохсуйан, бэйэ бородууксуйата дэлэйиэ, дьон- сэргэ остуолугар күннэтэ үүт аһылык араас көрүҥэ баар буолуо диэн эрэнэбит”, — диэн этэр Ион Семенович.
“Амма олоҕо” хаһыат
Хаартыска: Августина Иванова