Чурапчы улууһун Мугудай нэһилиэгин олохтооҕо, Эмис нэһилиэгиттэн төрүттээх Анна Пермякова бэлэсэпиэт тэбэн Олоҥхо ыһыаҕын кэлэн көрөн, бары тэрээһиннэргэ сылдьан астынан барда. Кинини кытта өссө 10 киһи сүүрэн уонна биир киһи бэлэсэпиэт тэбэн кэлбиттэр.
“Биһиги быйыл бэлэсипиэти таптааччылар “Дьулуур” кулууппут тэриллибитэ биэс сылын туолар. Ол чэрчитинэн уонна бэйэм дойдубар ыытыллар Олоҥхо ыһыаҕар сылдьаары, санаабын ууран туран, бэс ыйын 18 күнүгэр биир кулуубун чилиэнин уонна сүүрүктэр буолан кыттыһан Аммаҕа туруммуппут. Биһигини улуус дьаһалтатын таһыттан атаарбыттара.
Бөлөхпүтүгэр Таатта улууһун Чөркөөх нэһилиэгиттэн, Мэҥэ Хаҥалас улууһун Мэлдьэхсититтэн уонна Чурапчыттан сүүрүктэр бааллар этэ. Биһиги бэлэсипиэттээх дьон иккиэбит. Онон маннык састаабынан холбоһон үчүгэй баҕайытык айаннаан кэллибит. Мин биэс сыл аннараа өртүгэр Аммаҕа ыытыллыбыт 7-с Оонньууларга Чурапчыга олорор аммалары түмэн илдьэ кэлбитим. Онтон кэнники эбии кулууппутугар чурапчылар эмиэ кыттыспыттара. Онно күүстээх хамаанда буолан тэбэн кэлбиппит. Онтон бу сырыыга хомойуох иһин сорох дьоммут сорохторо үлэлии сылдьар, сорохторбут Бороҕоҥҥо сүүрэ барар буоланнар кыайан бу айаммытыгар кыттыспатылар. Ол да буоллар, иккиэ эрэ да буолан, сүүрүүнү таптааччылары кытта биир хамаанда буолан наһаа үчүгэйдик сылдьан кэллибит. Уопсай хамаанданы аатырбыт марафонец, элбэх сүүрүү кыттыылааҕа Егор Константинович Абрамов тэрийэн, салайа сырытта. Икки массыынанан, 12 буолан хоҥнубуппут. Эстафетнай диэн системанан тэбэн кэллибит. Ол аата анаммыт сиртэн биир бириэмэ бэриллэр. Ону биир массыынаҕа олорооччулар ким төһөнү барарынан үллэстэн айанныыбыт. Үчүгэй, интэриэһинэй эбит. Сөбүлээтибит.
Чурапчыттан Аммаҕа диэри биир да килэмиэтир биһиги кыттыыта суох хаалбата. Бэйэм биир бэлэсипиэти өссө илдьэ барбыт буоламмын, Мындаҕаайыттан Сулҕаччы кыраныыссатыгар диэри үһүө буолан тэбэн кэллибит. Массыынабыт көлүөһэтэ игин алдьанан Сулҕаччыга хойутаан кэлэн хоннубут. Сарсыарда биһигини аатырбыт биатлонист, хайыһардьыт Николай Максимовы үөрэппит Алексей Ильич Никифоров аара суолга көрсө түһэн, хата оруобуна бэртээхэй старт биэрдэ. Онон сылаастык көрсүбүт сулҕаччыларга махтал. Айанныыр кэммитигэр наһаа үчүгэй сөрүүн күннэр тураннар, бэртээхэй этэ. Соморсуҥҥа биһигини Александра Ноева салайааччылаах сүүрүктэр көрүстүлэр.
Онон уопсай ахсааммыт 20 киһи буолбута. Онон икки велосипедист, 18 сүүрүк буолан Аммаҕа кэлбиппит. Манна Амматааҕы оҕо спортивнай оскуолатыгар кэлэн көрсүһүү буолбута. Онон этэҥҥэ кэлэн, наһаа үчүгэй ыһыахха сылдьан, астынан кэллибит. Олус диэн үчүгэй тутуулар барбыттар. Салгыы бэйэм дойдубар Эмискэ барбытым”, — диэн Анна Николаевна айанын сырдатта.
Бэлэсипиэтинэн утумнаахтык дьарыктанар далбар Олоҥхо ыһыаҕар сылдьан баран, дойдутугар Эмискэ ыһыахха эмиэ бэлэсипиэтинэн турунна. Суолга сырыы элбэҕинэн, быыла да бэрт буолан 38 км баран баран тохтоон, салгыы массыынанан айаннаабыт. Ол да буоллар бу айанын кини бэйэтин тус кыайыытынан ааҕар.
“Амма олоҕо” хаһыат