Сэтинньи 6 күнүгэр ССРС суруйааччыларын сойууһун чилиэнэ, Арассыыйа Улахан литэрэтиирэтин бириэмийэтин лауреата, СӨ култууратын үтүөлээх улэһитэ, саха норуодунай суруйааччыта Василий Егорович Васильев- Харысхал төрөөбүтэ 75 сылын туолбута. Соморсун нэһилиэгэр Баһылай Харысхал аатынан норуот айымньытын дьиэтигэр улуус үөрэнээччилэригэр «Харысхал ааҕыылара-2025» уус-уран ааҕыы күрэҕэ ыытылынна, үөрэнээччилэр күүстэринэн испэктээх турда.
Ааҕыыларга Амма 1№-дээх оскуолатыттан, Амматааҕы лиссиэйтэн, Бөтүҥ, Мэндиги, Соморсун, Сэргэ-Бэс оскуолаларыттан оҕолор хоп курдук оҥостон, олус үчүгэйдик бэлэмнэнэн Баһылай Харысхал кэпсээннэриттэн, драмаларыттан быһа тардыылары уустаан-ураннаан аахтылар. Кыттааччылары улуустааҕы үөрэх салалтатын сүрүннүүр исписэлииһэ, СӨ үөрэҕэриитин туйгуна, киэн туттар эдэр прозаик суруйааччыбыт Наталия Рязанская, Күннүк Уурастыырап аатынан Амматааҕы кииннэммит бибилэтиэкэ тиһигин кыраайы үөрэтэр салаатын кылаабынай бибилэтиэкэрэ Вероника Стручкова, СӨ суруйааччыларын сойууһун чилиэнэ Дария Васильева -Амма Даайыс, режиссер, артыыс Евгений Николаев, Баһылай Харысхал бииргэ төрөөбүт балта, СӨ бэчээтин туйгуна Александра Терентьева сыаналаатылар. Түмүккэ алын сүһүөх кылаас үөрэнээччилэригэр Мэҥэ сурук 1 Үктэлин Гоголев Герман (Соморсун), 2 Үктэлин Александрова Дайаана (Сэргэ-Бэс), Кузьмин Эрчим (Соморсун), 3 Үктэлин Еремеев Эрсан (Соморсун), Гермогенов Ариан (Соморсун) ыллылар. Онтон 5-8 кылаас үөрэнээччилэрин ортолоругар Мэҥэ сурук 1 Үктэлинэн Шишигин Алеша (лиссиэй) уонна Гоголева Алиана (Соморсун), 2 Үктэлинэн Софронов Эрсан (Мээндиги), 3 Үрдэлинэн Никитин Дамир (лиссиэй) наҕараадаланнылар.
“Харысхал ааҕыылара-2025” уус-уран ааҕыы күрэһин өйөөн, өйдөөн күүс-көмө буолбут дьоммутугар Соморсун тыа сирин түөлбэтин баһылыгар Алексей Кононовка, Мээндиги тыа сирин түөлбэтин баһылыгар Илья Семеновка, “Чолбон” сурунаал бас эрэдээктэр Гаврил Андросовка, Соморсун орто оскуолатын дириэктэригэр Николай Андросовка, Соморсуннааҕы Баһылай Харысхал аатынан норуот айымньытын дьиэтин дириэктэригэр Надежда Игнатьеваҕа, Василий Егорович аймахтарыгар тэрийээччилэр ааттарыттан барҕа махталбытын тиэрдэбит.
Маны сэргэ норуодунай суруйааччыбыт үбүлүөйдээх сылыгар “Сэрии тыйыс тыына” айымньытынан испэктээх туруута биир бэлиэ түгэнинэн буолла. Ол курдук Баһылай Харысхал аатынан норуот айымньытын дьиэтигэр оскуолабыт иһинэн үлэлиир үөрэнээччилэр тыйаатырдара испэктээҕи нэһилиэкпит олохтоохторугар көрдөрдө. Үөрэнээччилэр олус кыһаллан, оруолларыгар толору киирэн оонньоотулар, сааланы толору мустубут көрөөччү астынна, дуоһуйда, дохсун ытыс тыаһынан уруйдаата. Испэктээҕи режиссердар Евгений, Нарыйа Николаевтар туруордулар. “Сэрии тыйыс тыына” испэктээк туруоруутун бырайыага улууспут дьаһалтатын “Инициатива молодых — развитию села” диэн грантовай күрэһин кыайыылааҕынан тахсыбыта. Испэктээх сыанаҕа тахсарыгар, бырайыак олоххо киирэригэр өйөбүл буолбут улууспут дьаһалтатыгар, күүс-көмө буолбут Баһылай Харысхал аатынан норуот айымньытын дьиэтигэр, оскуолабыт учууталларыгар, биирдиилээн дьоммутугар махтал буоллун. Саха норуодунай суруйааччыта Василий Егорович Васильев – Харысхал үгүс үлэни үлэлээбитэ, үйэлээх айымньылары суруйан хаалларбыта. Саха норуота кини аатын үйэлэргэ ааттыа, киэн тутта ахтыа.
Надежда ОХЛОПКОВА, А.П.Рязанскай аатынан Соморсун орто оскуолатын иитэр үлэҕэ дириэктэр сүбэһитэ