Амма улууһун бэтэрээннэрэ Таатта улууһун Баайаҕа нэһилиэгэр тиийэ сырыттылар. Ыраах айаны аахсыбакка кэлбит аҕам дьону таатталар ытыс үрдүгэр түһэрэн көрүстүлэр, сылаас чэйинэн, арыылаах алаадьынан, кыынньар кымыһынан айах туттулар. Ханнык-туох сыаллаах айан буолбутун салайан илдьэ сылдьыбыт улуус бэтэрээннэрин Сэбиэтин бэрэссэдээтэлэ Мария Захарова сырдатта.
“Быйыл улууспутугар Олоҥхо сылынан биллэриллэн, аны сайын өрөспүүбүлүкэтээҕи Олоҥхо ыһыаҕа ыытылларынан талыы талба талааннардаах Таатта улууһугар хайаатар да баран кэлэр, иистэнньэҥнэри билсэр, ону кытта бэйэбит кэллиэгэлэрбитин кытта уопут атастаһан, сэһэргэһэн кэлэр былааннаах бу айаммыт тэриллибитэ. Ол курдук Амма, Болугур, Соморсун, Мээндиги, Бөтүҥ нэһилиэктэриттэн түмсэн, уопсайа 11 буолан баран кэллибит. Биһигини баай устуоруйалаах Баайаҕа нэһилиэгэр, “Мандар Уус” саха олоҕун-дьаһаҕын кэлим түмэлин балаҕаныгар көрүстүлэр. Сахалыы сиэринэн аал-уоту аһатан, айах тутан алҕаабыттара олус долгутуулаах буолла. Итии чэйдээх, сандалы тула олорон билсиһэн, тумус туттар киһибит Мандар Уус аатынан түмэлгэ экскурсияҕа сырыттыбыт.
Экскурсовод Ольга Макарова олус интэриэһинэйдик барытын кэпсээтэ. “Мандар Уус” кыһатын салайааччыта Прасковья Бурнашева өрөспүүбүлүкэ тимирин уустара, ыччат дьон мустан уус кистэлэҥэр уһуйуллар киин үлэтин-хамнаһын билиһиннэрдэ. Модельнай бибилэтиэкэ филиалын сэбиэдиссэйэ Александра Кустурова кинигэ хомуйан оҥорооччулар кинигэлэрин быыстапкатынан, истиэндэнэн кэпсээн сырдатта. Бэйэм кэллиэгэм, Таатта улууһун бэтэрээннэрин Сэбиэтин бэрэссэдээтэлэ Маргарита Арисовна Попова бу көрсүһүүнү олус табыллан тэрийбит. Биир күн устата олох толору сырыттыбыт. “Аҕам саастаахтары кытта үлэ: бүгүҥҥүтэ, сарсыҥҥыта” диэн “төгүрүк остуол” тула олорон уопут атастаһан, үлэ-хамнас туһунан сэһэргэстибит, ону кытта бэйэ бэйэбитигэр музыкальнай нүөмэрдэрбитин көрдөрдүбүт. Онон олус туһалаах, кэскиллээх сырыы буолла диэн бары да астынан тарҕастыбыт, салгыы бииргэ үлэлииргэ сүбэлэстибит.
Түмүккэ кэллиэгэбэр Маргарита Арисовнаҕа, Баайаҕа нэһилиэгин бэтэрээннэрин Сэбиэтигэр көмөлөспүт бары чилиэннэригэр, Мандар Уус аатынан түмэл, Уус киинин бары үлэһиттэригэр улахан махталбытын тириэрдэбит. Ыраах сиргэ сымнаҕас олбохтоох массыынатынан тиэйбит Бессонов Егор Эдуардовичка итии-истиҥ махталбытын тиэрдэбит.
Транспорбытын кэпсэппит, кыһаммыт улуус баһылыгын бастакы солбуйааччытыгар Бураев Василий Ивановичка, үөрэх управлениетын начальнигар Ларионов Николай Александровичка аҕам саастаахтарга кыһамньыларын иһин махтал бастыҥа ананар. Ону сэргэ дэлэгээссийэҕэ киирэн ыраах айаны аахсыбакка баран көхтөөх кыттыыны ылбыт бэтэрээннэрбэр эмиэ махтанабын. Барыларыгар доруобуйаны, ситиһиилэри, дьолу баҕарабыт”, — диэн Мария Романовна Тааттаҕа айан туһунан кэпсээтэ.
“Амма олоҕо” хаһыат