Арассыыйаҕа биллэриллибит Дьиэ кэргэн сылын чэрчитинэн улуус уһуйааннарын төрөппүттэрин ортолоругар “Ийэм, аҕам уонна мин” диэн спортивнай күрэх бэрт сэргэхтик буолан ааста. Күрэхтэһии кыайыылаахтарынан кимнээх таҕыстылар, хайа дьиэ кэргэн өрөспүүбүлүкэҕэ Амма улууһун чиэһин көмүскүөҕэй?
Кыттааччылары быйыл Бүтүн Арассыыйатааҕы идэлээх күрэх лауреата, “Хатыҥчаана” уһуйаан физкультураҕа инструктора Рустам Седых арыаллаан киллэрдэ. Эҕэрдэлэри улуус спортка управлениетын исписэлииһэ Кирилл Захаров, үөрэҕин салаатын аатыттан Эмма Давыдова, Амма улууһугар “Бастакылар хамсааһыннара” үлэтин тэрийээччи исписэлиис Мария Слепцова тириэртилэр.
“Күрэхтэһиибит Амма нэһилиэгэр элбэх функциялаах улахан спортивнай саалаҕа буолан ааста. Барыта тоҕус дьиэ кэргэн улууспут нэһилиэктэрин уһуйааннарыттан кытыннылар. Күрэхтэһии хас да түһүмэхтэн турда.
Бу күрэх түмүгүнэн кыайыылаахтар ахсынньы ый 15 күнүгэр ыытыллыахтаах өрөспүүбүлүкэ күрэҕэр барыахтаахтар. Онон түһүмэхтэр ол чэрчитинэн ыытылыннылар. Ол курдук барыта аҕыс түһүмэхтэн турда. Ол түмүгүнэн кыайыылааҕынан Эмистээҕи “Чуораанчык” уһуйаан төрөппүттэрэ Ульяна Федоровна уонна Александр Александрович Ларионовтар уоллары Германы кытта буоллулар. Уһуйаан спорт инструктора Нонна Александровна Ноговицына. Онон бу дьиэ кэргэн кэлэр ыйга Дьокуускайга киирэн улуус чиэһин көмүскүөҕэ. Ларионовтар өссө эрдэ икки оҕолорун кытта эмиэ киирэн кыттан, бастакы, үһүс миэстэ буолбуттара. Кинилэргэ ситиһиилэри уонна кыайыыны баҕарбыт.
Онтон иккис миэстэни Соморсуннааҕы “”Чэчир” уһуйаан төрөппүттэрэ Ольга Иннокентьевна уонна Александр Александрович Неустроевтар кыыстара Лилияны кытта, спортинструктор Вера Семеновна Федорова, үһүс миэстэ Амматааҕы “Кэнчээри” уһуйаантан Сахая Евсеевна уонна Афанасий Алексеевич Старостиннар кыыстара Каролинаны кытта, спортинструктор Мария Егоровна Эверстова буоллулар. Бары кыттыбыт дьиэ кэргэннэргэ “Дьиэ кэргэн сыла” диэн өйдөбүнньүк бэлиэнэн бэлиэни туттардыбыт”, — диэн Амма улууһун үөрэҕин салаатын кылаабынай исписэлииһэ Эмма Давыдова сырдатар.
“Амма олоҕо” хаһыат