От ыйын саамай эппиэттээх кэмэ үүннэ. Бэйэ аһынан хааччыйар хороҕор муостаахпытын, сыспай сиэллээхпитин кыстатар оппутун, бурдукпутун булунар от хампаанньата, онтон хомуур үлэтигэр киирэн күүрээннээх үлэ саҕаланыа. Быйыл оппут үүнүүтэ хайдаҕый, окко киирэн эрэллэр дуо?
“Быйыл от тахсыыта ааспыт сыллары кытта тэҥнээтэххэ мөлтөх. Билэргит курдук саас өрүспүт улаханнык халааннаабакка, орто ходуһа уута кэлбэтэҕэ. Үрэхтэрбит эмиэ бэйэлэрин хааларыттан тахсыбатахтара. Онон хочолорго, үрэх добуун сирдэригэр да от билиҥҥи туругунан 10-15 эрэ см тахсан турар. Ардах түһэрэр зондировщик сөмөлүөккэ сайаапка түһэрэн ааспыт ый бүтүүтэ ардах кэлэн түспүтэ. Бу ый бүтүүтэ эмиэ сайаапкалаан олоробут. Күн-дьыл да уларыйда. Тымныы тыаллаах, түүнүн да улаханнык сылыйбат. Онон окко киирии маассабайдык от ыйын 12-15 күннэригэр буолуоҕа. Ол да буоллар билигин от үүммүтүнэн көрөн сорох чааһынайдар оттоон саҕалаатылар. От ыйын 9 күнүн туругунан 4 тонна оттоох олоробут. От
үүнүүтэ мөлтөҕүнэн хайаатар да миэстэтигэр оту оттоон булар сорук турар. Атын улуустары оттотор ходуһа суох. Онон бэйэбит нэһилиэктэр икки ардыларыгар оттооһуну тэрийиэхпит. Маныаха билигин мобильнай биригээдэр тэриллэн эрэллэр. Уопсайа 36 биригээдэ буолла. Нэһилиэктэр аайы от хампаанньатын тэрээһиннээхтик ыытыыга анал хамыыһыйалар тэрилиннилэр. Окко бэлэм үчүгэй диэххэ наада. Ол курдук уматык, саппаас чаас барыта кэлэн турар. Хаһаайыстыбалар да, бааһынайдар да от үүнүүтүнэн көрөн оттооһуҥҥа киириэхтэрэ. Баар сүөһүбүт да, сылгыбыт да ахсаанын аччаппат соруктаахпыт. От хампаанньата тэтимнээхтик барарын инниттэн улуус баһылыга Степан Николаевич Кузьмин өйөбүлүнэн нэһилиэктэр икки ардыларыгар күрэх биллэрдибит”, — диэн тыа хаһаайыстыбатын управлениетын салайааччыта Ион Кононов иһитиннэрдэ.
Ион Семеновичтыын сиһилии кэпсэтиини хаһыакка ааҕаарын.
“Амма олоҕо” хаһыат